Өнгөрсөн намар манай аймгийн ЗДТГ-ын Статистикийн хэлтсийн ажилтан эмэгтэй албан үүргээ гүйцэтгэж яваад бусдын гарт амь насаа алдсан харамсалтай хэрэг гарсан. Уг хэргийг үйлдэгч сэжигтэн Б-гийн сэтгэцийн байдал эргэлзээтэй, тодорхойгүй байсан тул хэргийг мөрдөн байцаалтанд дахин буцааж байсан. Энэ сарын 12-нд уг хэргийн шүүх хурал сум дундын 14 дүгээр шүүхэд болж, шүүгдэгч Б-д холбогдох эрүүгийн хэргийг шийдвэрлэсэн байна. Уг хэрэг өнгөрсөн оны есдүгээр сарын 22-нд болсон бөгөөд Статистикийн хэлтсийн ажилтан эмэгтэйг албан үүргээ гүйцэтгэж явахад нь Цагаанчулуут багийн 46-102 тоотод оршин суугч Б гэртээ дээрх хэргийг үйлдсэн. Төрийн албан хаагчийг удаа дараа хутгалан амь насыг нь онц харгис хэрцгийгээгээр хөнөөсөн хэргийг үйлдсэн этгээд болох Б нь сэтгэцийн өөрчлөлттэй эсэх, хэрэг хүлээх чадвартай эсэхийг тодруулахаар шүүхээс нэмэлт мөрдөн байцаалтанд буцааж байсан. Уг хэргийг аймгийн Прокурорын газраас шүүгчдэгч Б-д эмнэлгийн чанартай албадлагын арга хэмжээ авахуулахаар хэргийг шүүхэд ирүүлжээ. Сум дундын 14 дүгээр шүүх хэргийг хянан хэлэлцээд Б-д эрүүгийн Байцаан шийтгэх хуульд зааснаар эрүүгийн хариуцлагаас чөлөөлж, эмнэлгийн чанартай албадлагын арга хэмжээ авахаар шийдвэрлэсэн байна. Энэхүү харамсалтай хэргээс харахад, төрийн албан хаагч ажил үүргээ гүйцэтгэж явахдаа галзуу солиотой хүмүүсийн гарт амиа алдаж байгаа нь сэтгэцийн өөрчлөлттэй хүмүүст тавих эрүүл мэндийн байгууллагын хяналт сул байгааг бидэнд мэдрүүллээ. Мөн төрийн байгууллага тухайн ажилтнаас ажил үүргээ гүйцэтгэхийг шаарддаг ч амьд явах баталгааг нь хангасангүй. Талийгаач бүсгүйн арван настай хүүгийн асран хамгаалагчаар төрсөн эгч, хүргэн ахыг нь тогтоож, хохирогчийн 36 сарын тэтгэмж болон тэжээгчээ алдсаны тэтгэмжийн зөрүүг иргэний журмаар нэхэмжлэх эрхийг нь нээлттэй үлдээжээ. Албан ажлаа гүйцэтгэж явсан цэл залуухан бүсгүй галзуу хүний гарт амиа алдахад, төрөөс 36 сарын цалингаас өөр юу ч өгдөггүй хуулийн заалттай монголын төр алба хаагчдынхаа амь насыг хэзээ бүрэн хариуцдаг болох вэ.