Зул бичиг Эрхэм хүмүүнийг төрийн хүндэтгэл дор нутаглуулав Эрдэнэт хүмүүний ганц хөнөөл элдэв янзын өвчин л байх юм даа. Орхон аймгийн Засаг дарга асан Гүрсэдийн Зоригт ийм нэгэн хөнөөлд автаад нэлээд хугацааг тун шаналантай өнгөрөөлөө. Монголын нийгмийн сайн сайхны төлөө, тэр тусмаа олон арван жил ажиллаж амьдарсан Эрдэнэт хотын ард иргэдийн ирээдүйн төлөө сэтгэлээ чилээж, чадах бүхнээ хийхээр зориг шулуудсан энэ эрхэм өөрийн биед аймшигт өвчний шинж илэрснийг мэдсэн хэдий ч Засаг даргын мөрийн хөтөлбөрөө богино хугацаанд амжилттай хэрэгжүүлэх гэж, олон түмний их итгэлийг зүтгэлээр хариулах гэж маш их ухаан, хүч зарцуулсныг түүнд ойр байсан бүх хүн мэднэ. Г.Зоригт улс төрийн гарамгай зүтгэлтэн гэдгээ 2009, 2013 оны Монгол улсын Ерөнхийлөгчийн сонгууль, 2012 оны Орон нутгийн сонгуулиар тус тус бахархалтайгаар харуулж өөрийн удирдсан Орхон аймгийн Ардчилсан намыг дараалан ялалтанд хүргэж, улмаар журмын нөхдийнхөө итгэлийг хүлээн 2012 онд Орхон аймгийн Засаг даргаар сонгогдож байлаа. Эрдэнэт хотын эхний10 жилийн их бүтээн байгуулалтыг эс тооцвол сүүлийн 30 жилд энэ орон нутагт хийгдээгүй өөрчлөлт шинэчлэлтийг хийнэ гэж Засаг дарга мөрийн хөтөлбөртөө тусгасан нь хүртэл том зориг, алсын хараа байсан юм. Бодсон, төлөвлөснөө биелүүлж ч эхэлсэн. Жишээ нь, байгуулагдсанаас хойш 40-өөд жилийн шөнө түнэр харанхуй дунд тэмтчин, тун зүдэргээтэй амьдарч байсан Эрдэнэтийн гэр хорооллын иргэдийн хүсэлтийг харгалзан Орхон аймгийн гэр хорооллын бүх багийн орчинг Г.Зоригт агсан өдөр шиг гэрэлтүүлж чадсан. Өмнө нь зориулалт бусаар ашиглаж байсан дөрвөн цэцэрлэгийн барилгыг чөлөөлөн гэртээ цоожлогддог 1000 гаруй хүүхдийг цэцэрлэгтэй, тэдгээрт 140-өөд хүнийг ажлын байртай болгосон. Гэр хорооллын 11, 22, 23-р цэцэрлэгийг төвлөрсөн шугамд холбож, бохир ус татан зайлуулах асуудлыг нь шийдвэрлэж амжив. Орон сууцны байрууд болон гэр хороолол дунд хүүхдийн орчин үеийн тоглоом бүхий амралт, чөлөөт цагийн 13 талбайг шинээр байгуулж, тохижуулж өглөө. А.Амарын талбай, аюулгүйн тойрог, хотын төв гудамж дагуу гэх мэт газруудад ногоон байгууламж, цэцэгжүүлэлтийг шинэлэг хэлбэрээр хийлгэж “Хотын өнгө төрх ийм байдаг” гэсэн үлгэрийг үзүүлэв. Орон сууцны байр хоорондох замуудыг өргөтгөн шинэчилж иргэд машинтайгаа чөлөөтэй зорчих шинэчлэлийг ч хийсэн. Олон арван жил зогсонги байсан Эрдэнэт хотын бүтээн байгуулалтыг дахин эхлүүлж, зарим байрыг ашиглалтанд хүлээн авч, Засаг даргаар ажилласан 2 жилд 856 айлыг орон сууцтай болгож, 558 айлын 13 орон сууцны барилга баригдах нөхцөлийг бүрдүүлж, асуудлыг шийдвэрлэж өгсөн байна. Түүний Засаг даргаар ажилласан хоёр жилд энэ орон нутагт 57 үйлдвэр шинээр байгуулагдаж, олон мянган хүн ажлын байртай,орлогын эх үүсвэртэй болсон гэх мэтчилэн бичиж дуусамгүй олон буянт үйлсийг Засаг дарга агсан Г.Зоригт хийж бүтээжээ. Г.Зоригт агсан хүнд өвчинд ээрэгдэн, шаналан байсан хэрнээ Эрдэнэтийн иргэдийн төлөө ийм олон ажил хийж, их үйлс бүтээж өгөөд бурхны оронд одлоо. Харамсаад барамгүй. Улс, нийгмийн төлөө ёстой л чөмгөө дундартал зүтгэчихээд гавьяаны амралтаа авахаас ганцхан жилийн өмнө хорвоог орхисныг нь бодохоор бүр ч хоолой бачуурна. Г.Зоригтын энэ их хичээл зүтгэлийг төр, түмэн үнэлж, ийм эрхэм хүн цаг бусаар хорвоог орхисонд ихэд гашуудав. Тиймээс Эрдэнэтийнхэн 5-р сарын 25-нд Г.Зоригт агсаныг төрийн их хүндэтгэл дор сүүлчийн замд нь үдлээ. Орхон аймгийн Төрийн ёслол хүндэтгэлийн өргөөний хойморт түүний алтан шарил, хөрөг зургийг байрлуулж өмнө нь олон арван зул өргөжээ. Аав ээж, хань, үр хүүхэд, төрөл төрөгсдийг нь төрийн өргөөний зүүн жигүүрт хүндэтгэлтэй суулган Орхон аймгийн иргэд хойморт буй хөрөг зургийнх нь өмнө очиж мэхийн ёслоод хүндэтгэл үзүүлцгээв. Тэр өглөө нэг цаг үргэлжилсэн энэ ёслолд оролцох гэсэн хүмүүсийн цуваа тасрахгүй байлаа. Энэ богинохон хугацаанд 1000 орчим хүн түүнд мэхийн ёсолж хүндэтгэл үзүүллээ. Г.Зоригтыг сүүлчийн замд нь үдэж, нутаглуулах ажилд Улсын Их Хурлын гишүүн М.Батчимэг, Төв аймгийн Засаг дарга, нутгийнх нь иргэд хүрэлцэн ирэв. Мөн Эрдэнэтийн иргэдийг төлөөлөн 40 машин, 400-аад хүн түүнийг нутаглуулах ажилд оролцов. Тэд бүгд сэтгэлдээ мэгшин уйлж байсан. Хорвоогийн хатуу жам, мөнх бусын өмнө л хүмүүн заяа аргагүй сөхрөх юм даа. Г.Зоригт дарга маань сайн төрлийг олж, үр хүүхэддээ эргэж ирэхийн ерөөл өргөе. Ум сайн амгалан болтугай. Ж.ОЮУН