Их түүхийн гэрч, ирээдүй хойч үеийнхний өмөг түшиг, өрх гэрийн ноён нуруу, төр улсын тулгуур багана болсон ахмад буурлууд аа. Эх орны ирээдүйн итгэл найдвар болсон залуус, хүүхэд багачуудаа. Орхон аймгийн нийт иргэдээ. Та бүхэндээ Билгийн тооллын XVII жарны “ Согтууруулагч” хэмээх хөхөгчин хонь жилийн хаврын тэргүүн сарын шинийн нэгний чин сэтгэлийн халуун мэндчилгээг өргөн дэвшүүлж хүн бүхэнд эрүүл энх, айл өрх бүрт аз жаргал сайн сайхныг хүсэн ерөөе. Цагаан сар бол Монголчууд бидний хувьд төрлийн хэлхээ, төрийн ариун үйлсийн залгамж чанарыг үе үеийнхэнд ухааруулж сануулсан, билэгдэл хүндэтгэлийн дээд бүхэн цогцолсон гүн утгат эрхэм ёсон билээ. Энэ өдрүүдэд улиран буй он жилийнхээ нөөлөг, дүн нуруугаа дүгнэн цэгнэж, залган гарах жил улиралынхаа шинж байдал, өнгө төрх, төр улс, түмэн олныхоо цаашдын үйлсийг билэгдэн хэлэлцэж, үйл ажлынхаа зан мөр, явдал суудлыг тэгшитгэн засахыг эрхэмлэдэг нь монгол амьдралын давтагдашгүй нэгэн онцлог, эрхэм заншил билээ. Улиран одож буй модон морин жил өгөөж буянаа хайрласан жил байж, өнтэй тарган өвөлжиж урин хавартайгаа золгож байна. Хүн зон маань өсч 3 сая дах иргэнээ түмэн олноороо өлгийдөн авлаа. Гурван сая дах иргэний чацуутан 180 хүүхдийн 9 нь манай аймагт мэндэлсэнд есөн эрдэнийн хотынхон бид туйлын ихээр билэгшээж байна. Мал сүрэг маань өсөн үржиж 50 гаруй сая толгойд хүрсэн, атрын 3-р аян амжилттай үргэлжилж дотоодын нийт хэрэгцээгээ ханган ажиллаж байгаа зэрэг олон амжилтыг дурьдахад таатай байна. Улиран одож буй морь жил манай намын ажил амьдралд онцгой жил байлаа. Эрдэнэт хотод Монгол Ардын Намын байгууллага үүсч байгуулагдсаны 40 жил, ИУТБА-ийн хичээл эхэлж улс төр удирдахуй ухааны дээд боловсролтой залуусыг бэлтгэж эхэлсний 30 жилийн ойгоо бид ёслол төгөлдөр тэмдэглэсэн билээ. Манай намын эгнээ өдрөөс өдөрт өргөжин тэлж, гишүүд дэмжигчид маань урам зориг дүүрэн морь жилээ үдэж байна. Эрхэм хүндэт Эрдэнэтчүүд ээ. Та бүхэндээ сар шинийг мэндийг хүргэхийн ялдамд санаж сэдсэн ариун цагаан үйлс бүхэн тань сэтгэлчлэн бүтэхийн өлзийтэй ерөөлийг өргөн дэвшүүлье. Сар шинэдээ сайхан шинэлээрэй. Монгол Ардын Намын хорооны дарга, ИТХ-ын тэргүүлэгч                                       Д. Батлут