Орхон аймгийн МАХН-ын Мянгатын дарга Ё.Баярсайханыг үүрэгт ажлаас нь огцруулж, оронд нь Т.Оюунцэцэгийг томилсон аймгийн МАХН-ын 2 дугаар Бага чуулганыг өнгөрсөн сарын 14-нд хуралдуулжээ. Уг чуулганаар “аймгийн МАХН-ын анхан шатны байгууллагуудын ажлыг сайжруулах, бэхжүүлэх талаар хийгдэж байгаа ажил, цаашид тавих зорилт”, “аймгийн МАХН-ын дэд даргын тухай асуудал”-ыг хэлэлцэхээр төлөвлөжээ. Гэсэн ч чуулган эхлэх үед хэсэг гишүүд намын удирдах байгууллагын шийдвэрийг үл хүндэтгэн, хуйвалдааны маягтай, Гүйцэтгэх зөвлөлийн тайлангийн хурлыг хийлгэхийг хүч түрэн шаардаж, Ё.Баярсайхан даргын дүрмийн дагуу хуралдъя гэсэн тайлбарыг тоолгүй, хэсэг хүмүүс голдуу дайрч давшлан хурлыг тэр чигээр нь өөрсдийнхөө талд эргүүлж, дүрмийн бусаар намын даргын суудлыг хүч түрэмгийлэн авсан тухай хуралд суусан намын гишүүд ярьж байна. Чуулганыг “Номын төв”-ийн зааланд зохион байгуулсан тул тэндэхийн ажилчид “нам гэдэг ийм улаан цайм, яахаас ч буцахгүй, бүдүүлэг хүмүүсийн нэгдэл юм уу” гэж гайхаж байсан. Дээрх дүрмийн бус хурлын талаар аймгийн МАХН-ын хорооны дэргэдэх Ёс зүйн дэд хороо албан ёсны дүгнэлтээ гаргаж, Гүйцэтгэх зөвлөлд илгээсэн байна. Энэхүү албан бичигт “МАХН-ын дүрмийн заалтаар намын байгууллагын удирдах байгууллагын тайланг тавьж хэлэлцүүлэх хугацаа, дүрмийн зохицуулалт байсаар байтал Бага чуулганы хэлэлцэх асуудлыг мушгин гуйвуулж, аймгийн МАХН-ын мянгатын дарга Ё.Баярсайханы дүрмийн тухай тайлбар хийж, тайлангаа тавьж хэлэлцүүлэх талаар тодорхой санал хэлсээр байтал Гүйцэтгэх зөвлөлийн гишүүн Т.Оюунцэцэгийн хатган турхирснаар хэсэг гишүүд хуралдааны үйл ажиллагааг замбараагүйтүүлэн орилж хашгиран, ёс зүйгүй үйлдэл гаргасан нь Бага чуулганы хуралдааны хэлэлцсэн асуудлын ач холбогдолыг бууруулж, дүрмийн бус өөр асуудалтай хутгахад хүргэсэн байна. Дээрх дүгнэлтүүдийг үндэслэн Орхон аймгийн МАХН-ын Ёс зүй, хяналтын хорооноос 2015 оны нэгдүгээр сарын 14-ний өдөр болсон аймгийн МАХН-ын 2-р Бага чуулганы хуралдаан намын дүрэм, ёс зүйн асуудлыг зөрчсөн ажиллагаа болсон тул хүчингүйд тооцож, дахин Бага чуулганыг хуралдуулан дүрмийн дагуу асуудлаа хэлэлцэн шийдвэр гаргах талаар Орхон аймгийн МАХН-ын Гүйцэтгэх зөвлөлд саналаа хүргүүлж байна. Хэлэлцэн шийдвэрлэж хуулийн хугацаанд хариу өгөхийг хүсье. Хуулбарыг МАХН-ын Ёс зүй, хяналтын хороонд явуулав” гэж уг албан бичигт дурьдсан байна. Үүнээс харахад, аймгийн МАХН-ын даргаар Т.Оюунцэцэгийг сонгосон 2-р Бага чуулган дүрмийн бус болсон гэдгийг дээрх албан бичиг гэрчилж байна.