Оюун ухааны бүтээлээрээ Төрийн соёрхол хүртсэн инженер Н.Нацагням өнгөрсөн жил Засгийн газрын нэрэмжит 100 сая төгрөгийн шагналаар шагнагдсан манай улсын шилдэг зохион бүтээгч юм. “Дэлхийн шилдгүүдийн сэдэж, бүтээж байгааг Монголын инженерүүд хийж чадна гэдгийг бүтээлээрээ харуулж яваа инженерН.Нацагням Технологийн сургуулийн оюутнуудад сонирхолтой лекц уншлаа. Тэрээр “Синхрон генераторын реактив чадлын автомат тохируулга болох NaNyam-AX12 болон түүний виртаул лаборатори” бүтээлээрээ олон тэрбум долларын инновацын импортыг орлуулж чадсан юм. Шинжлэх ухааны салбарын 2013 оны технологийн дэвшлээр тодорсон түүний бүтээлийг манай улсын бүх станцад суурилуулбал эрчим хүчний систем ОХУ-аас хараат бусаар, бие даан ажиллаж чадахаас гадна аваар гарах, хүчдэл хэлбэлзэх үед эрчим хүчний систем найдвартай ажиллана гэж салбарынхан дүгнэжээ. Энгийнээр хэлбэл, айл өрхийн зурагт, хөргөгч цахилгааны хэлбэлзлээс үүдэж шатахгүй болно гэсэн үг. Инженер Н.Нацагням Английн Ай Ти компаниудад ахлах инженер хүртэл дэвшиж, есөн жил ажиллахдаа ердөө хоёр технологи сурч ирснээ бүтээл болгожээ. Монгол Улс импортлогч биш үйлдвэрлэгч-экспортлогч орон болоход энэ бүтээл маань түлхэц үзүүлнэ гэж үздэг инженер Нацагнямын яриа Технологийн сургуулийн оюутнуудад үнэтэй хөрөнгө оруулалт болж байна.Тэрээр “Эрдэнэт үйлдвэр”-тэй адил үйлдвэрийг инженерүүдийнхээ хүчээр байгуулах боломж байгааг онцолсон. Мөн Баяжуулах фабрикийн Цахилгаан хөтлүүрийн хэсгийн дарга Ц.Намжилдорж болон түүний удирдлагад ажилладаг инженерүүдийн оюуны чадавхийг өндөр үнэлж байсан юм.