Орхон аймаг, Эрдэнэт үйлдвэрийн хамтын ажиллагааны хүрээнд энэ онд 18 төрлийн ажил гүйцэтгэхээр төлөвлөөд байна. Үүнээс Үйлдвэрлэл технологийн паркийн чиглэлээр хамтран ажиллах, гэр хороололд амьдардаг үйлдвэрийн ажиллагсадын байр сууцыг инженерийн дэд бүтцэд хамруулах гэсэн хоёр чиглэлд илүү анхаарах төлөвлөгөөтэй байна. Дэлхийн зах зээл дэх зэсийн ханшийн уналтаас шалтгаалж “Эрдэнэт үйлдвэр”-ээс хийгдэх хөрөнгө оруулалт бага зэрэг удаашрах хандлагатайг албаныхан онцолж байна. Гэсэн ч Орхон аймаг, “Эрдэнэт үйлдвэр”-ийн хооронд байгуулсан хамтран ажиллах гэрээний дагуу энэ онд дараахь ажлыг гүйцэтгэхээр төлөвлөжээ. Тухайлбал, нийтийн эзэмшлийн талбайд үйлдвэрийн ажиллагсадын автобусны есөн зогсоолыг тохижуулна. Мөн 8-р сургуулийн биеийн тамирын талбайг тохижуулах, Эрдэнэтийн илгээлтийн эзэд анхдагч 250-300 хүнийг жил бүр үйлдвэрийн хөнгөлөлтөнд хамруулна. Мөн “Эрдэнэт үйлдвэр”-ийн нэрэмжит оюутны тэтгэлэгт хөтөлбөрийг хэрэгжүүлэх юм. Аймаг, үйлдвэрийн хоорондох хамтын ажиллагааны чиглэлээр орон нутагт барилга байгууламж шилжүүлэх тухай асуудал яригдаж эхэлжээ. Тухайлбал, Уурхайчин соёлын ордоны барилга, Эрдэнэт сувиллын байр, Цанын баазын барилга зэрэг орон нутгийн өмчит барилгыг “Эрдэнэт үйлдвэр”-ээс төрийн өмчид буцаан авах тухай яригдаж байна. Мөн гэр хороололд амьдардаг үйлдвэрийн ажиллагсадын байшин сууцыг инженерийн дэд бүтцэд хамруулахад Азийн хөгжлийн банкнаас хөнгөлөлттэй зээл олгох тухай яриа шийдвэрлэх шатандаа явж байна. Цаашид үйлдвэрийн эдийн засгийн сэргэлтээс шалтгаалж, “Москва 300”, “Залуус100”, эко хороололын бүтээн байгуулалтанд хамтарч, дэд бүтцийн хувьд үргэлжлүүлэн ажиллана. Орхон аймаг “Эрдэнэт үйлдвэр”-т эмнэлэгийн ар талд “Москва 300” айлын, хуучнаар Тээврийн товчооны урд талд “Залуус 100” айлын, “Эко 400” айлын орон сууцны хороолол барих газар олгожээ. Эдгээр орон сууцны хорооллуудын инженерийн шугам сүлжээг шийдэхэд аймаг туслахаар хамтран ажиллаад эхэлсэн байна. М.Мөнх