Орхон аймгийн МАХН-ын хороо Бага хурлаа хийж, өнгөрсөн оны ажлаа дүгнэсэн байна. Энэ үеэрээ аймгийн МАХН-ын хорооны дарга Ё.Баярайханы илтгэлийг хэлэлцэхдээ санал шүүмжлэл өрнүүлж, намын хуралд нөхөр, хүүхэд, дүүгээрээ нийлсэн нэг гэр бүлийнхэн оролцож, хурлын үйл ажиллагааг үймүүлж эхэлсэн байна. Намын Бага хурлыг зохион байгуулах үүрэг чиглэлийг удирдах дээд байгууллагаасаа авсаны дагуу хурлыг зохион байгуулсан ч энэ удаагийн хурал шинэ оны ажлаа төлөвлөж, улс төрийн сонгуульд бэлтгэх гол зорилгоосоо хазайж, гэр бүлээрээ асуудлыг хүчээр шийдсэн хурал болжээ. Бага хурлыг намын гишүүдээс нөхөр, охидууд, төрсөн дүүгээ дагуулж орж ирж, хурлыг үймүүлснийг бусад гишүүд дургүйцэн 20 гаруй хүн уг хурлыг орхин гарсан байна. Гэсэн ч улс төрийн намыг гэр бүлээрээ эзэмшигчид дүрмийн бус хурлаа үргэлжлүүлж, Т.Оюунцэцэгийг намын хорооны даргаар, н.Шархүүг нарийн бичгийн даргаараа сонгосон байна. Ийнхүү 2016 оны УИХ-ын сонгууль дөхсөн үед улс төрийн намыг нэг гэр бүлийн компанийн тогтолцоонд шилжүүлж, мөнгө, эрх мэдлийн төлөө яахаас ч буцахгүй гудамжны улс төр болгон хувиргасан байна. Л.Гэрэл