Орхон аймгийн АН-ын хороо өнөөдөр 17.00 цагт хуралдах гэж байгаа. Хуралдаанаар АН-ын одоогийн дарга Г.Зоригт намын даргын ажлаа өгөх тухай асуудлыг хэлэлцэх бололтой. Энэ цаг мөчид аймгийн АН-ын Зөвлөлдөх зөвлөл ардчиллын цэнхэр ордноо хуралдах сураг гарсан. Хэн нэг хүн намын дарга болж байдаг өгч л байдаг гэдэг үүднээс авч үзвэл өнөөдрийн энэ удаагийн хурал аймгийн АН-ын хувьд болох ёстой ээлжит нэгэн үзэгдэл байж гэмээр. Гэтэл энэ удаагийн хуралдаанаар АН-ын хэдэн арван мянган гишүүн төдийгүй дэмжигчид, Орхон аймгийн 100 гаруй мянган иргэний эрх ашиг хөндөгдөх гэж байгаа тул “Яагаад заавал чемодантай М.Батчимэг гэж..” бодон үзэг цаас нийлүүлэхээр шийдлээ. “Яагаад заавал чемодантай М.Батчимэг гэж...” хэмээн Орхон аймгийн АН-ын энэ цаг үеийн өнгийг авч яваа лидерүүдээс асуумаар байна. Өнөө цагийн аймгийн АН дотор аймгийн ИТХ-ын дарга Б.Мягмарсүрэн, аймгийн ИТХ дахь АН-ын бүлгийн дарга, тэргүүлэгч Ц.Батхуяг, “Эрдэнэт үйлдвэр” ХХК-ийн Ерөнхий захирлын Нийгмийн асуудал эрхэлсэн орлогч захирал С.Сувдаа, “Эрдэнэт ус” ОНӨҮГ-ын дарга Р.Гантулга гээд нэрлэгдэх олон эрхмүүдээс “Яагаад заавал чемодантай М.Батчимэг гэж ...” тулгаад байна вэ хэмээн нэхэл хатуутай асуумаар санагдана. Миний санахад л Монгол бахархлын баярын өдрийн мэндчилгээтэй зэрэгцэн “М.Батчимэг гишүүн аймгийн АН-ын дарга болох гэнэ” хэмээсэн бор шувуу ниссэн. Яг энэ өнцгөөс нь харвал Орхон аймгийн АН-д өөрийн гэсэн хар хайрцагны бодлого гэж баймаар санагдах юм. Нүүдлийн шувуу шиг чемоданаа чирээд ирдэг, чемоданаа ачаад буцдаг нөхдийг бид бишгүйдээ л нэг харсан. Одоо бидэнд тэр дундаа өнөөдрийн улс төрийн амьдралыг гартаа атгаж байгаа АН-д заавал нүүдлийн шувуу хэрэгтэй болсон юм уу. Аймгийн АН-д сонгогч түмнийхээ халуун сэтгэлийг тээгээд, даагаад явах залуусын төлөөлөл олон бий. Тэр залуусаа дэмжье л дээ. Тэдний дундаас Б.Мягмарсүрэн, Ц.Батхуяг нараас “Яагаад заавал чемодантай М.Батчимэг гишүүн аймгийн АН-ын дарга болох ёстой юм бэ” гэж асууя. Та бүхэнд Орхон аймгийн АН-ын дарга болох эрэмбэ байгаа. Орхон аймгийн АН-ын даргаар Б.Мягмарсүрэнг сонгожээ, Ц.Батхуягийг сонгожээ гэхэд АН-ын гишүүн, дэмжигчид байтугай нь толгой дохин зөвшөөрнө. Энэ эрхмүүдийн хувьд ч нэгэн цагт Орхон аймгийн Засаг дарга гээд явах эрэмбэ бий гэж хардаг. Өнөөдөр та бүхэнд орхончуудаа гэсэн чин сэтгэл, эрдэнэтчүүдээ хэмээсэн үнэн итгэл байдаг бол улс төрийн явцуу эрх ашигт бүү автаасай хэмээн сануулмаар байна. Аймгийн АН одоо л тэр дундаа өнөөдөр л зангидсан гар мэт нэг цул байж чадахгүй бол сонгогчдынхоо итгэлийг нэгмөсөн алдана. Юун тэр дараагийн сонгууль энэ тэр гэж. Ард түмэн та бүхнийг бидний асуудыг өөр нүдээр харж шийдвэрлээд өгөөч гэж сонгосон болохоос нүүдлийн шувуудыг өвөлжүүлээд УИХ-ын гишүүн болох замыг нь засаад өг гэж өөрсдийгөө төлөөлүүлээгүй. Тэгээд ч М.Батчимэг гишүүн аймгийн АН-ын дарга болсноор бүх зүйл “ОК” болоод л, наад зах нь өдрөөс өдөрт унаж байгаа мөнгөний ханш маргаашнаас эхлэн өссөн дүнтэй гарах уу. Харин ч М.Батчимэг гишүүн намын дарга болвол Эрдэнэтийн ардчилал цэнхэр биш СААРАЛ өнгөтэй болно. Орхон аймгийн АН-ын төлөө саналаа өгсөн сонгогчдын итгэл үнэмшил, хүсэл мөрөөдөл хаачих вэ. М.Батчимэг гэдэг хувь хүн бол намын жагсаалтаар УИХ-д сонгогдсон. Иймээс тэрбээр УИХ дахь АН-ын бүлгийн “өмч”. Түүнээс биш орхончуудын төлөөлөл биш. Орхончуудын хувьд саналаа өгөх ёстой хүмүүстээ л өгсөн гэж хардаг. Нэгэн их хүний “Алдаа онооны дэнсийг түүх хэмээдэг. Түүхийг бид бичдэг. Харин түүхийн алдааг хэзээ ч давтаж болохгүй” хэмээсэн үг бий. Аймгийн АН-ын даргаар хэн нэгнийг тавихын тулд “гадны хүмүүс” нөгөө нүүдлийн шувууд чинь энд тэнд хор найруулж байна, ар хударгаар чинь. Үйлдвэрийн Хүний нөөцийн хэлтсийн дарга Батдэлгэр гэдэг эрхэм аймгийн АН-ын зарим томоохон улстөрчдийг “Хэнтэй ч битгий уулз. Асуудлыг багцлах арга хэмжээнд битгий оролц” гээд улаан цайм тулгаж явна. Аймгийн АН-ын хорооны санал өгөх эрхтэй гишүүдийг бараг л гэрийн хорионд оруулж байгаад М.Батчимэг гишүүнийг аймгийн АН-ын дарга болгох арга сэдсэн бололтой. 2008-2012 оны Эрдэнэтийн улс төрийн уур амьсгал “Батдэлгэртэнгүүдийн” ийм найруулгаар явагдаж сүүлдээ бид аймгийн Засаг даргаа хэсэгтээ л “хар гэрт” суулгаад авсан. АН-ын хорооны дотоод асуудалд хөндлөнгөөс тэр дундаа үйлдвэрийн хурган дарга нар оролцох эрхгүй баймаар. Хорооны гишүүдийн санал өгөх эрхийг хасч, гэрийн хорионд оруулах тухай сэтгэж яваа нь ардчилсан нийгмийн өнгө мөн үү. Тэгээд ч олгой хагаравч тогоон дотроо гэдэгчлэн аймгийн АН-ын дотоод хэрэгт чемоданаа чирээд ирсэн Батдэлгэр мэтийн хурган дарга нарт падлий ч байхгүй. Эсвэл энэ найруулга холоос шидсэн чулуу юу. Тэгвэл тэднээс ч бас “Яагаад заавал чемодантай М.Батчимэг гэж ” асуумаар байна. Н.ТӨР