Саяхан аймгийн БОЭТ-ийн захирал Ч.Цэрэндагва эмч албан газар дээрээ архидаж тасарч унасан тухай асуудлыг баасан гаригт болсон Засаг даргын Зөвлөлийн хурал дээр онцгойлон авч үзэж ярилцсан байна. Ч.Цэрэндагва эмч өөрийн буруутай үйлдлийг хүлээн зөвшөөрч ажлаа өгөхөд бэлэн гэдгээ энэ үеэр мэдэгдсэн. Харин зөвлөлийн гишүүдийн зарим нь энэ асуудлыг арай өөр өнцгөөс харж шийдэх санал оруулж байв. Болсон бодит нөхцөл байлдлыг шалгах ажлын хэсгийг Засаг даргын орлогч Д.Энхбат ахалж ажилласан байна. Ажлын хэсгийн дүгнэлтээс харвал манай аймгийн Эрүүл мэндийн салбарт тэр дундаа БОЭТ –д эмнэлгийн стандарт гэсэн ойлголт ухагдахуун байдаггүй, байсан ганц нэг нь хэрэгждэггүй нэг үгээр хэлбэл хөл толгой нь мэдэгдэхгүй газар болсныг хүлээн зөвшөөрчээ. Хэдийгээр өнөөдөртөө БОЭТ хэмээн нэрлэж байгаа ч орон тоо хүчин чадлын хувьд бүсийн хэмжээний том эмнэлэг болоход 100 гаруй хүний орон тоо дутуу байдаг нь өнөөдрийн ийм байдалд хүргэсэн гэдгийг аймгийн Эрүүл мэндийн газрынхан мэдэгдсэн. Ийм хэрнээ БОЭТ-ийн дарга, удирдах албан тушаалтан голдуу 20 гаруй хүн өөрсдийгөө бүсийн хэмжээнд ажилладаг томоохон эмнэлгийн ажилтан гэж үзээд цалингийн зэрэг дэвээ нэмж бусдаасаа илүү цалин мөнгө авдаг гэнэ. Гэтэл үлдсэн ажилчид болох амбулаторийн эмч нар төдийгүй асрагч, үйлчлэгч нар Нэгдсэн эмнэлэгийн статусаар ажиллаж, Нэгдсэн эмнэлгийн эмч, ажиллагсадын цалингийн сүлжээгээр цалинждаг. Эндээс харвал манай аймаг БОЭТ-тэй ч юм шиг, үгүй ч юм шиг хэлбэрээр ажилдаг. Нөгөө талаас Нэгдсэн эмнэлэг хэвээрээ байгаа дүр зураг шалгалтынханд ажиглагджээ. Ганцхан жишээ дурьдахад БОЭТ-ийн дарга нар хоол судлаач их эмч байхгүй атал цалингийн сүлжээн дээр байгаа гэж бичээд цалинг нь ээлжээр авдаг тухай эмнэлгийнхэн өөрсдөө ам уралдан ярьж байна. Цаасан дээр байхгүй хүний нэр бичээд ажлын цагийг нь бүртгээд мөнгийг нь цохичихож байгаа бололтой. Энэ бүх асуудлыг Засаг даргын зөвлөлийн гишүүд ярилцаад эхний ээлжинд БОЭТ-ийн дарга Ч.Цэрэндагвын хувьд арга хэмжээ авъя, Эрүүл мэндийн яамтай яриад хойд эмнэлгийг БОЭТ байх уу, Нэгдсэн эмнэлэг болгох уу гэдгийг шийдэхээр болов. Энэ хурал дээр нэг сонирхолтой зүйл болсон нь бидний анхаарлыг татсан юм. Ч.Цэрэндагва эмчийн асуудал яригдах үед Засаг даргын зөвлөлийн гишүүн аймгийн Үйлдвэрчний эвлэлийн дарга М.Батцоож “Миний хувьд энэ асуудлыг ярихад ашиг сонирхлын зөрчил үүснэ. Ч.Цэрэндагва бид хоёр нэг айлын баз хүргэнүүд. Иймээс би энэ асуудалд оролцохгүй” гээд микрофоноо хаасан юм. Энэ жишиг цаашид төрийн албанд тогтвол засаг тунгалаг байх болов уу. Хурлын үеэр аймгийн Засаг даргын зөвлөх Т.Алтанхуяг “Өнөөдөр Цэрэндагвыг ажлаас халах амархан байна. Үүссэн нөхцөл байдлаас харвал Цэрэндагвын зургийг авч цахим сүлжээгээр тараасан тэр нөхдүүдэд тооцох хариуцлагын талаар ч ярих ёстой. Их муухай жишиг тогтох нь дээ. Хамт хоол идэж, пиво ууж байгаад халахаар нь зургийг нь аваад нийтэд ил болгодог ийм гаж гэмээр жишиг тогтох гээд байна. Энэ ажлыг эмч нар өөрсдөө хийсэн байна лээ. Бүр нэр устайгаа байгаа. Тэд өнөөдөр ч БОЭТ-д ажилладаг. Тэдэнд ёс зүйн хувьд хариуцлага тооцох ёстой. Сайтаар тэднийг хүний мөсгүй эрчүүд гэсэн байна. Үнэн ш дээ. Эмч нар ийм хүний мөсгүй, хүн чанаргүй болчихоор яах болж байна. Тэр хүн чанаргүй хүмүүсийн зарим нь албан тушаалд очихын төлөө ийм зүйл хийсэн ч гэж байна. Хариуцлага тооцох ёстой” гэсэн саналыг хүчтэй тавьж байсан юм.