АНУ-ын Лодердейл хотноо болж буй жүдо бөхийн залуучуудын ДАШТ өндөрлөлөө. Тэмцээний сүүлийн өдөр буюу өчигдөр Монгол Улс шинэхэн дэлхийн аваргатай боллоо. Жүдо бөхийн залуучуудын шигшээ багийн тамирчин Ө.Дүүрэнбаяр эхний барилдаанаа Эстонийн тамирчин Сильдвийр Хенричтэй хийж, дэлхийн аваргын барилдааныхаа салхийг хагалсан юм. Тэрээр өрсөлдөгчөө 02:09 секундэд цэвэр ялснаар дараачийн шатандаа Египетийн жүдоч Селим Халидтай барилдахаар учраа таарсан. Энэ барилдаанд тэрээр өрсөлдөгчөө юко үнэлгээгээр ялж, хэсгийн аваргын төлөө БНСУ-ын жүдоч Чой Мин Янгийг ялж улмаар хагас шигшээд Украйны тамирчин Кхаммен Лакивыг юко үнэлгээгээр дийлж, аваргын алтан медалийн төлөө өрсөлдөх эрхтэй болсон юм. Шигшээ барилдаанд тэрээр Гүржийн жүдоч Кибордзалидзе Гугаг 02:14 секундэд цэвэр ялснаар ийнхүү ДАШТ-ний 5 дахь өдөр аваргын алтан медалийг эх орондоо авчирлаа. Эх сурвалж: new.mn