Цагийн аяс, уртын урт амьдралын замд бүх л хүний нуруу бөгтийнө. Гэсэн ч зарим хүмүүсийн зүрхийг нь төр засаг бөхийлгөөд аль хэдийнэ 30-иад жилийг ардаа орихижээ. Тэднийг горьдлого тээж буцаах тун харамсалтай. Ийм сэтгэгдэл “Эрдэнэт Үйлдвэр”-т халуун залуу насаа үдсэн ахмадууд нэг дор цуглахад мэдрэгдэж байлаа. “Уурхайчин” Соёлын ордонд өнөөдрөөс 30 гаруй жилийн өмнө өрнөсөн өмч хувьчлалын цэнхэр тасалбараа “Эрдэнэт Үйлдвэр”-т өгсөн тухайн үед үйлдвэрт ажиллаж байсан ажилчид, ажилтан, Эрдэнэт хотын иргэдийн төлөөлөл цугларсан байлаа. Монгол Улс нэг намын дарангуйллаас нийгмийн шинэ үе рүү шилжсэнээр олон сайхан боломжийг ард олныхоо алган дээр тавьсаны нэг нь социалист өмчийг иргэн бүрт ногдох боломжоор нь хувьчилсан явдал юм.

Малчин хүнд нэгдлийн мал сүргээс тасдан өгч, жолоочид барьж явсан машиныг нь, оёдолчин хүнд оёдлын машиныг нь хувьчилж, эхийг нь эцээхгүй тугалыг нь тураахгүй бүгдийг өмчтэй болгож байсан. Яг ийм жишгээр өмч хувьчлалыг хийхдээ, албан тушаалтнууд илүү томыг, жирийн иргэд багавтрыг хүртсэн нь нууц биш. Харин багахан хэмжээг ч хүртээгүй хүмүүс бол “Эрдэнэт үйлдвэр”-ийн жирийн ажилчид юм. “Эрдэнэт үйлдвэр”-ийг үе үеийн Засгийн газар хувьчлахгүй авч үлдсээр ирсэн. Тиймээс ч зэсийн том үйлдвэрт хувь хөрөнгө оруулсан жирийн ажилчдын 30 гаруй жилийн өмнөх 7000 төгрөгийн ханш бүхий Цэнхэр тасалбарыг амь оруулах нөхцөл боломжийг гаргаж ирэхийн тулд хувьцаа эзэмшигчдээс Төрийн бус байгууллага байгуулаад ажилласан байна.

Тэдний байгуулсан Төрийн бус байгууллага нь цааш явах үндэс сууриа тавьж, өнөөдрийн хурлаар хязгаарлагдмал хариуцлагатай компани болгон өөрчлөхөөр хэлэлцүүллээ. “Эрдэнэт Үйлдвэр”-ийг дэлхийн хэмжээний томоохон үйлдвэр болон хөгжихөд хувь нэмрээ оруулсан тус үйлдвэрийн хувьцаа эзэмшигчдийн эрхийг хамгаалах, улмаар оруулсан хувьцааны ноогдол ашгийг шударгаар хуваарилах сайн тогтолцооны төлөө тэд нэгджээ.

Олны хүч оломгүй далай гэдэг, ардчилсан улсад өмч хувьчлалын ногдол ашиггүй үлдсэн “Эрдэнэт үйлдвэр”-ийн 1990-ээд оны үеийн ажилтан ажиллагсад, тэдний үр хүүхэд, тус үйлдвэрт өмчлөх эрхээ шилжүүлсэн олон мянган иргэдийн эрх ашиг хэзээд сэргэх нь дамжиггүй.