Засгийн газрын тогтоолоор хоёр жилд нэг удаа зохион байгуулдаг Монголын хүүхдийн спортын өвлийн VIII наадам өнөөдөр нийслэл Улаанбаатар хот болон Орхон аймаг, Эрдэнэт хотод нэгэн зэрэг нээлтээ хийлээ. 

Энэ удаагийн наадам хоёр өөр байршилд нэгэн зэрэг болж буйгаараа онцлогтой. Тодруулбал, өвлийн спортын мөсний төрлүүд нийслэлийн Хандгайтын мөсөн гулгуурын талбайд, цасны төрлүүд нь манай аймгийн Сархиа цанын бааз дээр болж байна. 

Эх орны өнцөг булан бүрээс шилдэг 546  тамирчин 478 багц медалийн төлөө  “Мөрөөдлийнхөө төлөө шударгаар өрсөлдье” уриан дор өвлийн спортын найман төрлөөр хурд , хүч авхаалж самбаагаа сорино.  Манай аймагт зохион байгуулж буй гүйлтийн цана, уулын цана, снөүбоардийн төрөлд 13 аймаг, нийслэлийн 6 дүүргийн 200 гаруй тамирчин оролцохоор иржээ. 
Наадамд Орхон аймаг, Эрдэнэт хотоос нийтдээ 75 тамирчин, 8 дасгалжуулагч оролцож байна. 

Энэ жилийн наадмын үндсэн төрлүүд дээр  тусгай олимпийн цасны гуталтай гүйлт, тусгай олимпийн гүйлтийн цанын төрөл нэмэгдсэн онцлогтой гэдгийг зохион байгуулагчид онцолж байв. 

Монголын хүүхдийн спортын наадмыг  1999 онд анх удаа зохион байгуулж байсан түүхтэй. 2023 онд  Монголын бүх ард түмний спортын өвлийн XVI  наадам, Монголын хүүхдийн спортын өвлийн VII наадмыг  орон нутагт анх удаа Орхон аймагт зохион байгуулж байсан билээ. 

Орхон аймаг, Эрдэнэт хот нь  бусад аймаг орон нутагтай харьцуулбал өвлийн спорт харьцангуй хөгжсөн, бааз сайтайгаарай ялгардаг. 2003 оноос хойш аймаг орон нутагтаа цана, биатлон, тэшүүр, хоккейн төрлүүдээр 10 гаруй удаагийн тэмцээн уралдааныг зохион байгуулсан туршлагатай. Мөн  2015 онд тэшүүрийн өсвөр үеийнхний улсын аварга шалгаруулах тэмцээн, 2013, 2015, 2017, 2020 онд хоккейн улсын аварга шалгаруулах тэмцээнүүдийг зохион байгуулж байв.   Монголын хүүхдийн спортын өвлийн наадмын бэлгэдэл нь уламжлал ёсоор “Галхүү” байна. Хүүхэд  багачуудад таниулах үүднээс  “Галхүү” хэмээн нэрийдсэн. 

Мэдээллийн төв