“Хил хязгааргүй сурвалжлагчид” (RSF) байгууллага нь Хэвлэлийн эрх чөлөөний шагнал гардуулах 32 дахь удаагийн ёслолыг 2024 оны арванхоёрдугаар сарын 4-ний өдөр Вашингтон ДиСи хотноо зохион байгуулах гэж байна. Дэлхийн өнцөг булан бүрийн 25 хувь сэтгүүлч, сэтгүүлчдийн баг, гэрэл зурагчид, хэвлэл мэдээллийн хэрэгслүүд “Эр зоригийн төлөө”, “Нөлөөллийн төлөө”, “Хараат бус байдлын төлөө”, 2023 онд шинээр нэмэгдсэн гэрэл зургийн “Лукас Долега-SAIF” гэсэн RSF-ын уламжлалт дөрвөн төрлийн шагналд нэр дэвшсэн байна. Энэ жилийн хувьд Африкийн эрэн сурвалжлах сэтгүүл зүйн шагнал-Мохамед Маига гэсэн төрөл шинээр нэмэгдсэн байна. 
Уг шагналыг Малигийн эрэн сурвалжлах сэтгүүлч, 1984 онд зүй бусаар амь насаа алдах хүртлээ Африкт нийгмийн шударга ёсны төлөө үгээ хэлж, үзгээрээ бичиж байсан Мохамед Маигагийн гэгээн дурсгалд зориулсан юм. 
Орос Украйны дайныг эсэргүүцсэн Оросын дараахь сэтгүүлчид дэлхийн нэр хүндтэй шагналд нэр дэвшжээ. 
Наталья Гуменюк (Украйн)
Наталья Гуменюк нь Украины нэрт сэтгүүлч, Нийтийн эрх ашгийн сэтгүүл зүйн хүрээлэн (PIJL)-гийн Гүйцэтгэх захирал юм. Дайны гэмт хэргийг баримтжуулж, сэтгүүлчдэд гэрчийн мэдүүлгийг шүүхэд ашиглахаар цуглуулах, халдашгүй бүрэн бүтэн байдлыг нь хадгалах талаар сургалт явуулдаг. “Украйн өчиж байна” нэртэй төрийн бус байгууллагыг хамтран үүсгэн байгуулагч юм. Оросууд Украйны нутаг дэвсгэрээс хүүхдүүдийг албадан шилжүүлсэн явдлын мөрөөр эрэн сурвалжлах нийтлэл хэвлүүлсэн. Олон улсын эрүүгийн шүүх (ICC) түүний эрэн сурвалжилга дээр үндэслэн 2023 оны гуравдугаар сард Ерөнхийлөгч Владимир Путин, ОХУ-ын Хүүхдийн эрхийн асуудлаарх комиссар Мария Львова-Белова нарыг баривчлах тогтоол гаргасан.
“Sota.Vision” (Орос)
“Sota.Vision” нь Орост ховордсон хараат бус хэвлэл мэдээллийн хэрэгсэл юм. Залуу сэтгүүлчид нь тус улсад өрнөж буй эсэргүүцлийн жагсаал цуглаан, шүүх хурал, Засгийн газрын дарамт шахалтын талаар видео бичлэгээр дамжуулан мэдээлсээр байна. Тэдний телеграм суваг нь цөллөгт буй олон байгууллага, тэр дундаа хэвлэл мэдээллийн хэрэгслүүдийн мэдээлэл авах чухал эх сурвалж болдог. Сурвалжлагчид нь байнгын дайралтад өртдөг, Антонина Кравцова (Фаворская нэрээр танигдсан), Артём Кригер нарын сэтгүүлчид цагдан хоригдож байна. Антонина Фаворская нь сөрөг хүчний улстөрч Алексей Навальныйгийн шүүх хурлын талаар түүнийг 2024 оны хоёрдугаар сарын 16-нд шоронд нас барах хүртэл мэдээ сурвалжилга бэлтгэж байжээ. 2024 оны тавдугаар сард “Sota.Vision”-ын хоёр сэтгүүлчид "гадаадын агентууд"-ын тухай хууль зөрчсөн хэргээр торгох ял оногдуулсан байна.
Алсу Курмашева (Орос/АНУ)
Оросын эрх баригчид 2023 оны аравдугаар сард Алсу Курмашеваг тус улсад ийм төрлийн анхны эрүүгийн хэрэг болох "гадаадын агент”-ын бүртгэлээ хийлгээгүй, "Дайнд үгүй гэж хэлэх нь: Украины эсрэг Оросын түрэмгийллийг эсэргүүцсэн орос хүмүүсийн тухай 40 түүх" товхимол бичилцсэнээр цэрэг армийн нэр хүндийг гутаасан хэргээр баривчлан саатуулагдсан юм. Уг товхимолд хориотой сэдэв болсон Оросуудын Украины эсрэг үйлдсэн халдлагын талаар ил гаргаж, Оросын Ижил мөрний эрэг хавийн оршин суугчдын өчлийг нэгтгэжээ. Курмашевагийн ажилладаг “Чөлөөт Европ радио/Эрх чөлөө радио”-гийн Татар-Башкирын асуудал эрхэлсэн албанаас уг товхимлыг хэвлэн нийтлүүлсэн. Курмашеваг энэ оны наймдугаар сарын 1-нд хоригдол солилцох үеэр сэтгүүлч Эван Гершковичийн хамт сулласан.