“Оросын талд байсан “Эрдэнэт”-ийн 49 хувийг “Монголын зэс копораци” худалдаж авлаа. “Эрдэнэт” үйлдвэр” 100 хувь Монголын өмч боллоо” хэмээн зарласнаас хойш найман жил өнгөрөв. Харин УИХ-аар хэлэлцүүлэлгүй хувийн компанид хувьчилж өгсөн гэж буруутгаж, яллахаар шүүх дээр долоон жил гацлаа. Шийдвэр нь хэзээ хэрхэн гарах нь тодорхойгүй ч монголчууд саалийн үнээгээ 100 хувь сааж байгаа. Монголчууд ч гэж дээ эрхтэн дархтанууд. Төр 51 хувь эзэмшдэг байхад нь л тансаглаж байсан тэд 100 хувь авчихаад хэрхэж байгаа нь тодорхой.

“Эрдэнэт үйлдвэр” ковидын үед 600 тэрбумаар монголчуудын тог, цахилгааны төлбөрийг дааж байсан. Дарга нарын тансаглал, шахааг танахад л төсөвт төлдөг татвараасаа гадна  ийм хэмжээний ашигтай ажилладаг гэсэн үг. Тэгвэл өнөөдөр энэ мөнгийг төрд гарсан нөхдүүд тонохгүй байгаа гэсэн баталгаа хаана байна вэ.  Үнэхээр шударга ёс тогтоох гэж байгаа бол Л.Оюун-Эрдэнэ сайд үүнийг ч шалгаж, шилэн болгох ёстой сон. Тиймдээ ч “Эрдэнэт үйлдвэр”-т дахин БЭТ /Бүрэн эрхэт төлөөлөгч/ томилох чимээ чих дэлсэж эхлэв. Зарим нэг нийгмийн цех, хэсгүүдийг татан буулгаж, санхүү удирдлагынхныг бүрэн солих юм байх. Томилогдож ирсэн төлөөлөгч нь хардлага сэрдлэгийг зогсоож, хэм хэмжээг нь тогтоож, үнэн зөв ажиллана гэдэгт итгэе. Харин зөв бурууг нь тогтоож чадахгүй долоон жил гацаад байгаа 49 хувийн тухай товчхон сануулъя.

“Эрдэнэт”-ийн 49 хувийг худалдаж авах түүхэнд ганц тохиох боломжийг Оросын талаас олгож. Гэхдээ тэр нь 12 хоногийн хугацаатай гэх. Энэ хугацаанд амжиж мөнгө босгож авч чадахгүй бол “Эрдэнэт”-ийн 49 хувь Монголоос тэс өөр харь эзний гарт очих байлаа. Гэтэл дотоодынхоо зовлон, гачаалыг нуруундаа арай ядан үүрч яваа өр зээлэндээ баригдсан Монголын Засгийн газарт  богино хугацаанд 1,1 их наяд төгрөг гаргах чадал байгаагүй. Энэ үед Монголын нэг компани “Бид мөнгө  босгоод “Эрдэнэт”-ийн 49-ийг худалдаад авъя” гэж дугараад байхад тэнэг л биш бол хэн ч үгүй гэж хэлж чадахгүй. Тэгээд ч Монгол бол төр, хувийн хэвшил нь тэгш эрхтэй байхаар Үндсэн хуульдаа тунхагласан ардчилсан орон.

 “Эрдэнэт”-ийн 49-ийг төр нь авна уу, хувь нь авна уу хамаагүй. Эцсийн дүндээ “Эрдэнэт үйлдвэр” 100 хувь Монголын өмч болж байвал ирээдүйд ирэх ашиг, орлого манайд л хэрэгтэй.   Энэ том эрх ашгийг бодолцож Ч.Сайханбилэгийн танхим хамтын шийдвэрээр тогтоол гаргаж, “Монголиан коппер корпрейшн” компанид 49 хувийг худалдаж авах эрхийг олгосон гэгддэг.

 Сонгууль хаяанд ирчихсэн УИХ-ын чуулган завсарлачихсан. УИХ-ын гишүүд нь тойрог руугаа давхилдчихсан үед тэднийг цуглуулж чуулган хуралдуулна гэдэг бэрх.  Цугладаг юм аа гэхэд энэ асуудлыг хэлэлцэж хэрэлдэхийг нь хүлээж суух хугацаа “Эрдэнэт”-ийн 49-ийг шийдэхэд байгаагүй. Хувийн хэвшлийн компани нэгэнт мөнгөө босгоод ирж байхад “Хаанаас, хэнээс хулгай хийв чи” гээд тогоо руу нь өнгийж, тооцоо бодож суух цаг ч үлдээгүй Ч.Сайханбилэгийн танхим УИХ-аар хэлэлцүүлэлгүй  шийдсэн. Ч.Сайханбилэг гаргасан шийдвэрийнхээ горыг амсч, өнөөдөр улс төрийн тавцанд “дүүжлүүлэх"-ээ хүлээж байгаа нь энэ. Ийнхүү сонгуулийн өмнө 49 хувийн асуудлыг идэвхжүүлэхийн тулд БЭТ томилох нь цаг хугацааны асуудал болоод байгаа гэнэ.