УИХ-ын гишүүн асан, хүн амьны хэрэгт сэжиглэгдэн муулуулагч, ял шийтгүүлээд цагаатсан Нямтайширын Номтойбаяр Эрдэнэт хотод өнгөрсөн амралтын өдрөөр ирээд буцлаа. Иргэд, сэтгүүлчидтэй уулзсан эхний өгүүлбэр нь "Эвсэл бол нам биш. Хэний ч өмнө нээлттэй" гэсэн нь олны танил улстөрчдөөр эгнээгээ нэмнэ гэсэн санаа бололтой. Энэ ч яахав түүнийг улс төрд эргэн ирэлт хийхэд товлосон хүмүүсийн нэртэй нь яригдаж байсан яриа. Замнал нь гурав дахь Ерөнхийлөгч Н.Энхбаяр 2012 онд МҮАН, МНН-тай эвсэл болж их хуралд суудал авч байсан шиг. Харин ярьж байгаа нь өөр юм.
Хоригдож, яллагдсандаа хорсож гомдоллосонгүй. Нэр заан цохон чичлэлгүй эвслийн зорилгыг ярьсан нь "Нэг улстөрчид мянган мэргэжилтэн" гэх өгүүлбэр байлаа. Ингэж зохицуулалт хийвэл инженерүүдээ улс төрөөс ангид, хил заагтай болгох юм гэнэ. Яг энэ цаг хугацаанд хамгийн хэрэгтэй зүйлийг олж хараад ярьж байгаа нь тэр л байна. Улстөрчдийн ямар нэгэн шийдвэрээр үндсэн ажлаа ч хийж чадахгүй улстөржилт хийдэг болсон ажилтан албан хаагч, инженер техникийнхэнд их л тааламжтай мэдээ.
Ард түмэнд ч ашигтай. Ажил хэрэг болгоод улс төрөөс мэргэжилтэн, инженерүүдээ салгаж чадвал алгаа ташаад дэмжье. Угаасаа л сонгууль дөхөхөөр тойрог тойргоо усалж явдаг нь улстөрчдийн жам байдаг ёсоор Үндэсний эвслийн тэргүүн Н.Номтойбаяр Эрдэнэт хотод ирсэн. ГОК-ыг ч яаж мартхав. Яриад л эхэлсэн. Гэхдээ үйлдвэрт зориулсан төлөвлөгөө танилцуулахын оронд цугласан хүмүүсээс үйлдвэрээ хувьд өгөх үү, улсад байлгах уу мэтээр асуулт асуугаад байсан нь анхаарал татав. Эрдэнэт үйлдвэрийг төрд буцаан авахад Номт хүү аль талд нь явсныг эргээд нэг харчихмаар л юм. Ямартай ч юу сэдээд байгаа нь тодорхойгүй ч ирэх парламентийн сонгуульд ялалт байгуулаад УИХ-д суудалтай болчихоод " Өө миний өссөн, төрсөн Монгол ардын нам минь" гээд эргээд нийлчихгүй л бол түүний улс төрийн зураглал одоохондоо бусдаас эрүүл юмдаг уу даа.
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ErdenetNews.mn хариуцлага хүлээхгүй.