Гэрийн тэжээвэр амьтдын тухай хууль хэрэгжиж эхэлсэнтэй холбоотой гудамжинд нохой буудаж, хүүхэд, хөгшид айлгадаг дүр зураг гарахгүй болж байгаа. Гэхдээ Орхон аймагт өнгөрсөн долоо хоногт 109 нохой устгасан тухай албаны хүн мэдээлсэн. “Нохой устгалыг хийхдээ буудахаас өөр арга нэвтрүүлэх”-ийг аймгийн Засаг даргын үүргийг түр орлон гүйцэтгэгч М.Түмэнжаргал Хот тохижуулах газар болон бусад албаны хүмүүст санууллаа. Үүнээс харахад, дээрх 109 нохойг ямар аргаар устгасан нь тодорхойгүй үлдэж байна.

Нохой, муурны үржлийг зогсоох мэс ажилбарыг хэдэн жилийн өмнө хийж байсан туршлага Орхон аймагт бий. Уг ажилд төсвөөс овоо хэдэн төгрөг зарцуулж, баахан нохой, мууранд мэс ажилбар хийсэн ч үр дүн гараагүй гэхэд болно. Гудамж зам талбайгаар сүрэглэсэн нохой хүн рүү дайрч байгаа нь жирийн үзэгдэл боллоо. Нохойг буудахгүйгээр яаж устгах вэ гэдгийг мэргэжлийнхэн судалж, ямар төсөв хөрөнгө гаргах талаар даруйхан танилцуулах үүрэг өгөөд байгаа. Саяхан, хэдэн жилийн өмнө орон сууцны подваль руу хор цацаж, муур устгасан нь хүмүүсийн дургүйцлийг хүргэсэн. Гэрийн тэжээвэр амьтдын тухай хуулиар амьтан тэжээгч эздийн эрх, үүргийг тодорхой болгосон. Эздэд хүлээлгэх хариуцлага, торгууль шийтгэлийг хуулийн дагуу зохицуулна. Гагцхүү Орхон аймгийн гэр хорооллын 20 мянга гаруй өрхийн хорин мянган нохойг яаж бүртгэлжүүлж, эзэнжүүлэх вэ гэдэг “том сэдэв” хэвээр байгаа юм.  Нохой, муурын үржлийг зогсоох, устгах ажил дээрх хуулиар дан ганц төрийн хариуцах ажил биш болж байгаа юм.