Улстөрч Н.Номтойбаяр Үндэсний Эвсэл байгуулсанаа зарлаж байсан саяхан. Аймгуудад эвслийнхээ үзэл баримтлал, зорилгын талаар уулзалт хийж байгаа. Энэ амралтын өдөр Орхон аймагт ажилласан юм.
Үндэсний Эвсэлийн Тэргүүн Н.Номтойбаярын яриаг багцалвал:
-Үндэсний эвсэл бол улс төрийн нам биш. Ямар ч намын гишүүн, хувь хүн нэгдэхэд нээлттэй. Нэг улстөрчид 1000 мэргэжилтэн ногдож байвал, улс хөгжих үндэс болно. Тиймээс ч Н.Номтойбаяр миний бие улстөрч нь байя, туршлагатай мэргэжлийнхэн, эрдэмтэд маань эвсэлээ дэмжээрэй.
-Эрүүгийн хуулийн 22-р зүйл ангиар шийтгүүлсэн хүн улс төрийн сонгуульд оролцох нь хаалттай. Миний хувьд энэ зүйл ангиар шүүхээс ял шийтгэл аваагүй учир нэр дэвших эрх маань нээлттэй гэсэн үг. УИХ-ын гишүүн байхдаа эргэн төлөгддөггүй зээлийг төлөгддөг болгосон. Дээрх ойлгомжгүй зүйлсийг өөрчилснийхөө төлөө шүүхээс 7,7 жилийн ял сонсоод эргэн цагаадсан.
-НАМЗХ-ны тэргүүн байх үеэсээ улс төрийн намууд эвсэж ажиллах зүй ёсны шаардлагатай гэдгийг мэдэрсэн. Үндэсний эвсэл гэдэг өнөөдөр цоо шинээр ярьж байгаа асуудал биш юм. Нам харгалзахгүй эвсэх шаардлагыг Монголын ардчиллын түүхэн дэх он жилүүдийн алдаа оноо, туршлагаас бид харлаа.
-Эрдэнэт үйлдвэрийг төрийн өмчид байлгасаар байх уу, хувийн хэлбэрээр сайжруулаад явах уу гэдэг дээр 2016 онд судалгаа хийхэд, оролцогчдын 90 гаруй хувь төрд байх нь зүйтэй гэсэн санал өгсөн. Харин саяхан явуулсан судалгааны 60 гаруй хувь нь хувьд шилжүүлэхийг дэмжсэн. Цаашид төрийн өмчит томоохон үйлдвэрүүдийг ямар замаар авч явах вэ гэдэг чухал сэдэв хэвээр байна.
-Төр үндэстний язгуур эрх ашгийг дээдэлж ажиллах ёстой болохоос хувийн хэвшлийнхээ ажлыг булааж авдаг тогтолцоотой байх ёсгүй. Төр удаан болхи, хөгжил муу байна.
-Эрүүл мэнд, боловсролын тогтолцоог сайжруулахад өөрчлөлт хэрэгтэй гэдэг ч төрийн оролцоог багасгаж, хувийн байгууллагууддаа боломж олгох үндэсний бодлого хэрэгтэй байна.
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ErdenetNews.mn хариуцлага хүлээхгүй.