Сургууль, цэцэрлэг, хүүхдийн байгууллагын ойролцоох зам талбайн гэрэлтүүлгийг сайжруулах үүргийг аймгийн Боловсрол, шинжлэх ухааны газарт иргэдийн мэдээллийн дагуу аймгийн удирдлагаас өгсөн. Үүний дагуу ЕБС-ийн 4 сургууль, 12 цэцэрлэгт нийтдээ 23 гэрэлтүүлэг нэмж байршуулжээ. Сургууль, цэцэрлэгийн захиргаа өөрсдийн хүчээр дээрх камер нэмэх ажлыг хийсэн байна. Харин аймгийн Боловсрол, шинжлэх ухааны газраас камержуулалтын материалын 1,6 тэрбум төгрөгийн зардлын саналыг нэгж байгууллагуудаас авч, 2024 оны төсөвт тусгуулах саналаа Нийгмийн бодлогын хэлтэст хүргүүлсэн байна.

Хүүхдийн байгууллагын орчмын гэрэлтүүлгийг харанхуйд яагаад асаахгүй байгаа талаар боловсролын байгууллагынханаас асуухад, “цахилгааны төлбөр өндөр гардаг” гэсэн хариулт өгч байсан. Уг нь хүүхдийг аюулгүй орчноор явуулж байхын тулд сургууль орчмын гэрэлтүүлгийн цахилгааны төлбөрийг төлж дийлэхгүй болтолоо эдийн засгийн чадавх нь муудсан аймаг бол Орхон аймаг биш. Боловсролын байгууллагыг удирдаж байгаа хүмүүст хүүхдийн төлөө гэсэн сэтгэл дутагдаж байна уу, эсвэл аймгийн боловсролын байгууллагын удирдлагын хандлага, сэтгэлгээ хоцрогдоод байна уу. Аймгийн Засаг даргын шуурхай зөвлөгөөний сүүлийн хоёр 7 хоногийн мэдээллээс харахад, Жаргалант сумын сургуулийн дотуур байрны халаалтын хэрэгсэл шатсан, гэрэлтүүлгийн бүрэн бус байдал зэрэг нь боловсролын салбарын хариуцлагагүй байдлын жишээнүүд болоод байна.