Аймгийн ИТХ-ын ээлжит XVI хуралдаан пүрэв гарагт болсон. Хуралдааны хэлэлцэх асуудлын 3-д “Сүм, хийдийн үйл ажиллагаа явуулах, хугацаа сунгах” тухай асуудлыг авч хэлэлцсэн. Илтгэлийг аймгийн ИТХ-ын БХИОХ-ийн дарга Б.Золоо танилцуулсан юм.

Аймгийн хэмжээнд үйл ажиллагаа явуулдаг 26 сүм, хийд байдаг аж. Тэдний 10 нь буддынх бол исламын нэг, үлдсэн нь Христын сүм, хийд байна. Христын 15 сүмийг задалбал Морманы 1, Протестант 5, Ёховагийн 1, Евангел 4, Адвенист 1, Католик 3 болох гэнэ. Энэ удаад үйл ажиллагаа эрхлэх хугацаагаа сунгах хүсэлт ирүүлсэн буддын 2, христын 11 сүм, хийд байжээ. Өнгөрөгч наймдугаар сарын 22-ны өдөр  “Аймгийн хэмжээнд үйл ажиллагаа явуулж буй хугацаа сунгах хүсэлт ирүүлсэн сүм, хийдүүдэд хяналт, шалгалт хийх ажлын удирдамж”-ийг  ИТХ-ын даргаар батлуулж мөн сарын 24, 25, 28-ны өдөр хяналт шалгалт хийжээ.

Шалгалтаар дараах зөрчил илэрсэн байна. Үүнд, сүм, хийдүүд Үл хөдлөх хөрөнгийн татвар төлдөггүй, төлбөрийн баримт хэвлэх тоног төхөөрөмжгүй, хугацааг журмын дагуу сунгуулаагүй, зөвшөөрөлгүй барилга байгууламж барьсан, үйл ажиллагаа явуулж байгаа хэдий ч татварын Х тайлан гаргадаг, камержуулалт байхгүй, номлогч иргэдийн хувьд визний ангилал тодорхойгүй, Улаанбаатар хотод төвтэй ч Орхон аймагт  салбар хариуцсан эзэн тодорхойгүй, Хүүхдийн эрхийн улсын байцаагчтэй гэрээ байгуулаагүй, Хүүхэд хамгааллын бодлого байхгүй, зөвшөөрөлгүйгээр хэлний сургалтын үйл ажиллагаа эрхэлдэг, гадна хаяг байхгүй, ажлын байрны ариутгал, цэвэрлэгээ хийдэггүй, галын аюулгүй байдлын дүгнэлт гаргуулаагүй, ТББ-ын нэр дээр үйл ажиллагаа явуулдаг гэх ч тэрхүү ТББ нь шашны үйл ажиллагаа явуулах зөвшөөрөлгүй зэрэг зөрчил багтжээ.

Ажлын хэсгийнхэний хийсэн хяналт шалгалтын дагуу үйл ажиллагааны зөрчлөө арилгах хугацаатай үүрэг даалгавар өгч ажилласан байна. Ингээд хяналт шалгалтаар илэрсэн зөрчлөө арилгаагүй сүм хийдийн зөвшөөрлийг сунгахгүй байх, зөрчлөө арилгасныг нь сунгах саналыг аймгийн ИТХ-д оруулсан байна. Энэ асуудлыг аймгийн ИТХ-ын төлөөлөгчид авч хэлэлцээд буддын 1, христын 7 сүм, хийдийн үйл ажиллагаа эрхлэх зөвшөөрлийг сунгахаас татгалзжээ.