Аймгийн ИТХ-ын Зөвлөлийн хурлаар 2023-2024 оны хичээлийн шинэ жилийн бэлтгэлийн талаар танилцсан юм. Энэ үеэр аймгийн БШУГ-ын дарга О.Ариунгэрэлт “Хичээлийн шинэ жилийн бэлтгэл ажил ерөнхийдөө дуусч байгаа. Есдүгээр сарын 1-н гэхэд Уран эгшиг сургуулийн засварын ажил дуусахааргүй байгаа. Иймд бид компанитай хоёр удаа уулзсан. Есдүгээр сарын 8-н гэхэд дуусгах тал дээр ярилцсан. Компанийн зүгээс бүхий л боломжоороо ажиллахаа амласан. Иймд Уран эгшиг сургуулийн хичээлийг 9 дүгээр сарын 1-нээс эхлэн 1 долоо хоног цахимаар явуулна. Үүнээс өөр арга байхгүй байна. Есдүгээр сарын 8-н гэхэд засварын ажлыг дуусгах чиглэл өгсөн. Амжих эсэхийг сайн мэдэхгүй байна. Бид шахаж байгаа.

Хоёр ээлжийн үндсэн багштай 10 цэцэрлэгийн хувьд өмнөхөөрөө явна. Бид өөр бусад цэцэрлэгт хоёр ээлжийн үндсэн багш авч ажиллуулахаар зар өгч байна. Цэцэрлэгийн багш нарын нөөц бага байна. Нийслэл хотод олон цэцэрлэг ашиглалтад орж байгаа учраас цэцэрлэгийн багш нар дутагдалтай байгаа. Судалгаа гаргаад, зарлал өгөөд боловсон хүчин болох цэцэрлэгийн багш нар боломжийн хэмжээнд байвал энэ хичээлийн жилд нэмээд 2-3 цэцэрлэгт ээлжийн үндсэн багш авч ажиллуулахаар төлөвлөж байна” гэлээ.