Аймгийн ИТХ-ын Зөвлөлийн ээлжит 11 дүгээр хуралдаан Амарын танхимд боллоо. Энэ удаагийн зөвлөлийн хурлаар “Орон нутгийн өмчит хуулийн этгээдүүдийн 2023 оны үйл ажиллагааны тухай” асуудлыг авч хэлэлцсэн. Энэ хүрээнд аймгийн Орон нутгийн өмчийн газраас Орон нутгийн өмчит байгууллагуудын 2023 оны гүйцэтгэлийн төлөвлөгөөний II улирлын биелэлтэд хяналт хийж, дүгнэсэн байна. Орон нутгийн бмчит хуулийн этгээдүүд нь Гүйцэтгэлийн төлөвлөгөөний биелэлтийг Засгийн газрын 2020 оны 217 дугаар тогтоол, Засгийн газрын Хэрэг эрхлэх газрын даргын 2020 оны 100 дугаар тушаалын 7 дугаар хавсралтын дагуу байгууллагын гүйцэтгэлийн тайлангийн загвараар тайлагнаж ирүүлэх үүрэг хүлээсэн байдаг ажээ.

Гэтэл манай аймгийн хэмжээнд үйл ажиллагаа эрхэлдэг Орон нутгийн өмчит хуулийн этгээдүүд тайлангаа цаг хугацаандаа ирүүлдэггүй дутагдлыг нийтээрээ гаргаж байгааг Орон нутгийн өмчийн газрын дарга илтгэлдээ танилцуулсан юм. Тайлангаа цаг хугацаандаа ирүүлээгүйгээс болж аймгийн хэмжээний тайлан мэдээ цаг хугацаандаа гарах, Засгийн газрын 217 дугаар тогтоол, Засгийн газрын Хэрэг эрхлэх газрын даргын 100 дугаар тушаалын хангалт манай аймагт учир дувагдалтай болдог байна. Иймд орон нутгийн өмчит байгууллагын удирдлагууд  тайлангаа цаг хугацаандаа ирүүлэх шаардлагатай байгааг илтгэгч онцолсон юм.

Аймгийн ИТХ-ын дарга Д.Мөнхбат “Орон нутгийн өмчит байгууллагын удирдлагууд тайлангаа цаг хугацаанд нь заасан маягтын хүрээнд ирүүлэх үүрэгтэй. Энэ үүргээ биелүүлдэггүй орон нутгийн өмчит байгууллагын дарга нарт хариуцлага тооцох ёстой. Орон нутгийн өмчит байгууллагын дарга нар төсөв хэлэлцэх үеэр, цалин нэмэх тухай болоход саналаа зохих журмын дагуу оруулж ирдэггүй. Төлөөлөгчдөөр дамжуулаад дэмжүүлэх шийдвэр гаргуулах гээд гүйлддэг. Энэ асуудлаа болих хэрэгтэй. Орон нутгийн өмчийн газраас асуудлаа оруулж ирэхгүй бол аймаг орон нутгийн хэмжээнд хүндрэл учирч байгаа тухай Оюунгэрэл даргын тайлбарыг би сайн ойлгож байна. Үүн дээр анхаарах ёстой шүү” хэмээлээ.