Уртын гол багт баригдаж буй 258 айлын орон сууцны эхний ээлжинд ашиглалтад орсон 104 байрыг Улсын комисс ажиллан хүлээн авчээ. Улсын комисс 7 сарын 7-нд ажиллажээ. Уг байрны нэг метр кв-ын үнэ 1 сая 952 мянга 798 төгрөг байхаар аймгийн ИТХ-ын тогтоол гарсан юм. Эхний ээлжинд ашиглалтад орсон байрнаас 77-г нь зах зээлд 100 хувь худалдан борлуулах тухай мэдээлэл өнгөрөгч даваа гарагаас эхлэн цахим орчинд гарсан.

Энэ шийдвэрийн талаар аймгийн Засаг даргын захирамжаар байгуулагдсан Ажлын хэсгийн ахлагч М.Мөнхбаяр хэвлэлийн бага хурал хийлээ.

Энэ үеэр ажлын хэсгийн ахлагч М.Мөнхбаяр хэлэхдээ “Эхний ээлжинд ашиглалтад орсон 77 байрыг 100 хувь худалдан борлуулах шийдвэрийг би болоод манай ажлын хэсгийнхэн гаргаагүй. Хамгийн гол нь аймгийн ИТХ-ын төлөөлөгчид 100 хувь худалдан борлуулна гэж батлаад тогтоол гаргуулсан. Манай Ажлын хэсгийнхэн аймгийн ИТХ-ын 35 төлөөлөгчийн гаргасан, баталсан тогтоолыг хэрэгжүүлэх үүрэгтэй ажиллаж байна. Аймгийн ИТХ-ын тогтоолд 100 хувь худалдана гээд заасан байгаа. Энэ хүрээнд бид ажиллана. Өнөөдөр Монголд нэг метр нь 1 сая 952 мянга 798 төгрөгийн үнэтэй барилга байхгүй. Улаанбаатарт хамгийн бага нь 2.5 сая төгрөгийн ханштай байна. Дархан хотод 2.6 сая төгрөг гэж байна. Бид харин ч хамгийн бага үнээр худалдан борлуулах гэж байна.

Энэ 77 байрыг 100 хувь худалдаад дараагийн 3 блок барилгын ажлыг эхлүүлэх мөнгөө гаргаж авна. Барилгын ажлыг гүйцэтгэж байгаа компани мөнгөө нэхээд байгаа. Тиймээс энэ 77 барилгыг борлуулаад мөнгийг нь компанид өгснөөр дараагийн 3 блокын ажил үргэлжлэхээс өөр боломж алга. Энэ барилгыг барих үед Төрийн хэмнэлтийн тухай хууль гараагүй байсан. Хууль гарснаар аймгаас, Эрдэнэт үйлдвэрээс энэ барилга руу мөнгө оруулах ямар ч боломж байхгүй болсон. Ажлаа цааш үргэлжлүүлэхийн тулд ийм шийдвэр гаргасан. Түүнээс биш аймгийн Засаг дарга байр зараад ийм тийм болоод байгаа зүйлгүй. Аймгийн ИТХ-аас 100 хувь худалдан борлуул гэсэн тогтоол гарсан учраас түүнийг л хэрэгжүүлж байна” гэлээ.