Эрдэнэт үйлдвэрийн цехүүд, “Эрдэнэт” сувиллын цогцолбор хамтран Олон улсын эмч нарын өдрийг тохиолдуулан “Эмч тандаа талархъя” баярын үйл ажиллагааг өнгөрсөн баасан гарагт Уурхайчин соёлын ордонд зохион байгууллаа. Баярын үйл ажиллагаанд цех хариуцсан эмч нар, цехүүдийн удирдлага, хүний нөөцийн мэргэжилтнүүд оролцлоо. Энэхүү үйл ажиллагааг нээж “Эрдэнэт” сувиллын цогцолборын Чанарын менежер Г.Машбат эмч нарт баярын мэндчилгээ дэвшүүлэн үг хэллээ. Цехүүдийн удирдлага, хүний нөөцийн мэргэжилтнүүд Эрүүл мэндийн төлөө тангараг өргөсөн цагаан нөмрөгтнүүддээ чин сэтгэлийн талархал илэрхийлэн, гарын бэлэг гардуулав. Мөн энэ үеэр Соёл, урлагийн цогцолборын уран бүтээлчид эмч нарт зориулан ая дуугаа өргөсөн юм. Эрдэнэт үйлдвэр нийгмийн хариуцлагын хүрээнд ажилтнуудынхаа эрүүл мэндийн төлөө цех бүрийг хариуцсан эмч ажиллуулдаг. Нарийн мэргэжлийн 30 гаруй эмч өөрсдийнхөө ажлын зэрэгцээ хариуцсан цехийн ажилтнуудыг өвчлөлөөс урьдчилан сэргийлэх, нийгмийн эрүүл мэндийн сургалт, сурталчилгаа хийж, төсөл хөтөлбөр хэрэгжүүлэн, өдөр тутам эрүүл мэндийн үзлэг хийж, түргэн тусламжийн үйлчилгээ үзүүлдэг. “Эрдэнэт” сувиллын цогцолборын нэг эмч 200-400 хүний эрүүл мэндийг хариуцан ажиллаж байна.