Олон улсын эмэгтэйчүүдийн эрхийг хамгаалах өдрийг угтан Монголын эмэгтэйчүүдийн холбооны Орхон аймаг дахь салбар зөвлөл, аймгийн ЗДТГ хамтран “Эмэгтэйчүүдийн хөгжил оролцоо” чуулганыг зохион байгууллаа.  Олон улсын эмэгтэйчүүдийн эрхийг хамгаалах өдөр буюу  гуравдугаар сарын 8  бол дэлхийн улс орнууд эмэгтэйчүүдийн эрхийг баталгаажуулан, улс төр, нийгэм, эдийн засгийн амьдралд тэгш оролцуулах, тэдний  эрхийн төлөөх тэмцлийг шинэ эрч хүчээр цэнэглэх, эв санааны нэгдлийг бэхжүүлэх онцгой өдөр юм

    Жил бүр холбогдох байгууллагууд хамтран энэхүү  өдрийг угтан эмэгтэйчүүдийнхээ дуу хоолойг сонсох,  эдийн засаг, улс төр, нийгэм, гэр бүлдээ эзлэх байр суурийг бэхжүүлэхэд чиглэсэн олон талт нөлөөллийн ажил арга хэмжээг  зохион байгуулдаг билээ.  “Эмэгтэйчүүдийн хөгжил оролцоо” чуулганд  аймгийн нийт хүн амын 54 мянга гаруй буюу 51,6 хувийг эзэлж буй  эмэгтэйчүүдийн төлөөлөл 450 гаруй эмэгтэйчүүд оролцож, тэдэнд  Монголын эмэгтэйчүүдийн холбооны Орхон аймгийн салбар зөвлөлийн тэргүүн “Эрдэнэт үйлдвэр” ТӨҮГ-ын Тамгын газрын дарга Д.Үүрийнтуяа, аймгийн ИТХ-ын дарга Д.Мөнхбат, аймгийн Засаг даргын орлогч А.Түвшинжаргал нар мэндчилгээ дэвшүүлэн үг хэлэв. 

     Монголын эмэгтэйчүүдийн холбооны Орхон аймгийн салбар зөвлөлийн тэргүүн “Эрдэнэт үйлдвэр” ТӨҮГ-ын Тамгын газрын дарга Д.Үүрийнтуяа “Орхон аймгийн эмэгтэйчүүдийн салбар зөвлөл шинэ бүрэлдэхүүнтэйгээр үйл ажиллагаа явуулж эхэлснээс хойш хэдийн дөрвөн жил өнгөрчээ. Энэ хугацаанд аймаг, орон нутгийнхаа нийт хүн амын 51,6 хувийг эзэлж байгаа эмэгтэйчүүдийн эрх ашгийг хамгаалж, тэдэндээ хүрч ажиллахын төлөө тасралтгүй үйл ажиллагаа явуулсаар ирсэн” гэлээ.  Мөн тэрээр, аймгийн удирдлагууд бидний үйл ажиллагааг дэмжиж, “Эмэгтэйчүүдийн хөгжлийг дэмжих хөтөлбөр”-ийг  боловсруулж, аймгийн ИТХ-ын хуралдаанаар батлуулан хэрэгжүүлж байгаад  талархал илэрхийлэв. 

 Дэлхийн улс орон бүр хүйсийн тэгш байдал эмэгтэйчүүдийн манлайлал, эдийн засаг, нийгэм улс төр, гэр бүлийн амьдралд эмэгтэйчүүдийн эзлэх байр суурийг нэмэгдүүлэхэд өөр өөрийн арга барилаар анхаарлаа хандуусаар ирсэн. Монгол Улсын нийт хүн амын 50 гаруй хувийг эмэгтэйчүүд эзэлж байгаа боловч  нийгмийн аль ч салбарт эмэгтэйчүүдийн төлөөлөл хангалтгүй, оролцоо бага байсаар байгаа юм. Аймгийн ИТХ-ын найм дахь удаагийн бүрэн эрхийн хугацаанд анх удаа “Эмэгтэйчүүдийн хөгжлийн хөтөлбөр”-ийг баталж, хэрэгжүүлсний үр дүнд эмэгтэйчүүдийн эрх, хөгжил, өнөөгийн байдал, манлайлал зэрэгт  тодорхой үр дүн гарч байгаад талархаж буйгаа  аймгийн ИТХ-ын дарга Д.Мөнхбат хэллээ. 

     Манай аймгийн нийт хүн амын 54 мянга гаруй буюу 51,6 хувийг эмэгтэйчүүд эзэлж байна. 2022 оны жилийн эцсийн байдлаар хөдөлмөрийн насны 56 мянган хүн ажил эрхэлж байгаагийн 47,3 хувь эмэгтэйчүүд байна.  Орхон аймгийг хөгжүүлэх таван жилийн үндсэн чиглэлийн  бодлогын баримт бичигт хүүхэд эмэгтэйчүүд рүү чиглэсэн  Гэр бүл, хүний хөгжил  оролцоог дээшлүүлэх, Жендэрийн эрх тэгш хангах, эрүүл мэнд, боловсрол нийгэм, хүн амын хөдөлмөр эрхлэлтийг дэмжих эмэгтэйчүүдийн эрхийг хамгаалал чиглэлээр олон зорилт үйл ажиллагааг тусган хэрэгжүүлж байгаагийн  тод жишээ нь АИТ-ын хурлаар батлан хэрэгжүүлж байгаа  "Эмэгтэйчүүдийн хөгжлийн хөтөлбөр" юм.
Өнөөдөр төрийн албанд ажиллагчдын 60 гаруй хувийг эмэгтэйчүүд эзэлж байгаагийн удирдах, шийдвэр гаргах түвшинд долоон хувь,  гүйцэтгэх төвшинд 53 хувь нь ажиллаж байна.