“Нөхөрлөл, Тэмүүлэл, Амжилт” уриан дор 8 хоногийн турш үргэлжлэх Монголын бүх ард түмний өвлийн спортын  XVI наадам, Монголын хүүхдийн спортын VII наадмын албан ёсны нээлт тун сонирхолтой, гэнэтийн олон бэлэгтэй бусад аймаг орон нутгийн тамирчин, дасгалжуудагчдыг алмайруулсан үйл явдлаар дүүрэн байлаа.

Аймгийн Засаг даргын орлогч А.Түвшинжаргалаар ахлуулсан Зохион байгуулах хорооныхон өвлийн спортын наадмыг уралдаан тэмцээн гэхээсээ илүүтэй өвлийн аялал жуулчлалыг хөгжүүлэх, Орхон аймаг Эрдэнэт хотоо бусад аймгийнханд сурталчлах чиглэлд илүүтэй хандуулсан байлаа. Нээлтийн ажиллагааны үеэр “Хангарьд” паласын тайзнаа Монгол улсын хөдөлмөрийн баатар, урлагийн гавьяат зүтгэлтэн, төрийн шагналт Б.Шаравын “Сэрсэн тал” аялгууг эгшиглүүлсэн нь нээлтийн ажиллагааны хамгийн гоё сюрприз болсон юм. Орхон аймгийн соёл, урлагийн байгууллагын хөгжимчид “Сэрсэн тал”-ыг эгшиглүүлэхд Эрдэнэт хотын билэгдэл арслан өөрийн гэр бүлийн хамтаар мөн Их наадмын билэгдэл Галхүүтэй цуг “Хангарьд”-ын талбайг эзэгнэж тамирчдад хүндэтгэл үзүүлэв.

Энэ үйл явдал нь шашны зан үйл болох Даншиг наадмын үеэр Цагаан өвгөнийг цэнгүүлсэнээс ч илүүтэй утга төгөлдөр, өнгө ялдам дүрслэл, өгүүлэмж,  агуулгыг илэрхийлсэн  дүр зураг байлаа.