Аймгийн ИТХ-ын Зөвлөлийн хуралдаанаас шийдвэр гарч Нутгийн удирдлагын ордны  Хурлын заалыг Монгол улсын Ерөнхий сайд асан А.Амарын нэрэмжит болгохоор болжээ. Ингэснээр манай аймгийн ИТХ-ын хуралддаг Хурлын Их танхим энэ өдрөөс эхлэн А.Амарын нэрэмжит танхим хэмээн нэрлэгдэх болсон аж.

Аймгийн орон нутгийн 4.2 тэрбум гаруй төгрөгөөр бүтээн байгуулсан уг Хурлын ордон энэ сарын 26-ны орчим ашиглалтад орохоор болоод байгаа гэнэ.

Төрийн Ордонд аль нам засаг барихаасаа эхлэн Хоёр том танхимыг МАН, АН-ынхан “хувьчилж” авдаг. Тухайлбал, одоо цагт Төрийн ордонд МАН сууж байгаа учраас “Их жанжин Сүхбаатар танхим”-д МАН-ынхан Бүлгийн хурлаа хийж суудаг. Харин АН-ынхан “Их эзэн Чингис хааны танхим”-д Бүлгийн хурлаа хийдэг билээ.

Манай аймгийн ИТХ дахь МАН- ын Бүлгийнхэн өөрсдийнхөө шийдвэрээр “А.Амар сайдын нэрэмжит танхим” байгуулсан бол сөрөг хүчнийхэндээ барилгынхаа зоорийн давхарт ч болов мухарт нь ганц өрөө гаргаад өгчих болов уу хэмээн өнөө хэд нь Д.Мөнхбат даргын царайг ширтээстэй сууна.