Ерөнхий сайд Л.Оюун-Эрдэнийн Засгийн газрын дэвшүүлж байгаа “Алсын хараа-2050” хөгжлийн хөтөлбөрийн хүрээнд Улаанбаатар хотын төвлөрлийг бууруулах, хөдөөгийн хөгжлийг дэмжих зорилгоор олон санаачлага ажил хэрэг болж эхлээд байгаа. Эдгээрээс Улаанбаатар хотоос хөдөө орон нутаг руу шилжин ирж, суурьшин амьдрах иргэд, гэр бүл, аж ахуйн нэгжийг аймгууд өөрсдийн нөөц бололцоо, боломжийн дагуу дэмжих бодлогыг дэвшүүлээд байна.

“Шинэ сэргэлтийн бодлого”-ын “Хот, хөдөөгийн сэргэлт” зорилтыг хэрэгжүүлэх хүрээнд Улаанбаатар хотоос орон нутагт шилжин суурьших иргэдийг дэмжих “Хамтдаа Эрдэнэтэд хөгжье” үйл ажиллагааны хөтөлбөр, төлөвлөгөө боловсруулах, сургалт, хэлэлцүүлгийг хийлээ. 

“Хамтдаа Эрдэнэтэд хөгжье” хөтөлбөрийг зөвлөгөөний үеэр танилцуулж, аймгийн ИТХ-аар батлуулахаар өргөн барих юм.

Хөтөлбөр  бодлогын баримт бичигт эрчим хүч, аж үйлдвэржилт, хот хөдөөгийн тэнцвэрт хөгжил, ногоон хөгжил, төрийн  бүтээмж зэрэг зургаан багц асуудлыг тусгасан. Улаанбатараас шилжин ирж байгаа иргэдэд хуулийн дагуу үнэгүй олгох 0,07 га газрыг олгох боломж Орхон аймагт бий юү. Мөн ажлын байрны хүрэлцээ, хангамжийг хэрхэн нэмэгдүүлэх вэ гэдэг эн тэргүүний шийдэх асуудал болоод байна.

Зөвлөгөөнд Улаанбаатар хотоос Орхон аймагт шилжиж ирэн ажиллаж, амьдарч байгаа иргэдийн төлөөлөл оролцож санал бодлоо хуваалцлаа. Тэдний хувьд банкны салбараас орон нутагт шилжин ирэгсдэд үзүүлэх ипотекийн гурван хувийн зээлийн талаарх мэдээллийг илүү сонирхож байна. Энэ талаар Засгийн газраас гарсан шийдвэртэй уялддуулан орон нутаг уян хатан шийдэх бодлого барих нь тодорхой.

 Орхон аймаг “Гарааны бизнес” төслийг амжилттай хэрэгжүүлж, өнгөрсөн онуудад өрхийн болон бичил бизнес эрхлэгчдийг дэмжих, ажлын байр нэмэгдүүлэх чиглэлээр олон ажлыг шат дараатай хийж ирсэн. Иймд цаашид манай аймагт шилжин ирэгсэд “Гарааны бизнес”-ийн хөтөлбөрт хамрагдаж, бизнесээ хөгжүүлэх боломж байгаа. Шинжлэх ухаан технологийн паркийн 1700 м кв талбай бүхий гарааны бизнесийг бойжуулах томоохон материаллаг баазтай гэдгийг тус газрын дарга мэдээллээ.

“Хамтдаа Эрдэнэтэд хөгжье” хөтөлбөрийг боловсруулснаар Орхон аймаг 108 мянган хүн ам дээрээ 20 мянган иргэн нэмж суурьшуулах нөөц суурь, эдийн засгийн боломж, ажлын байр нэмэгдүүлэх зэрэг бодлогын чанартай олон гарц, шийдлийг эрж хайн боловсруулж, улмаар хэрэгжүүлэх  ажил хүлээгдэж байна.