Ардын хувьсгалын 100, 101 жилийн ойн түүхт их баяр наадмын үндэсний бөхийн барилдаанд аймгийн арслан Ө.Батзул тав давж Монгол улсын начин цолны эгнээнд алхан орж ирсэн юм. Ө.Батзул бол “Эрдэнэт үйлдвэр” ТӨҮГ-ын “Энэрэл” төвийн хүү. “Эрдэнэтийн  бүжиглэдэг аймгийн арслан” нэртэй түүнийг эрдэнэтчүүд улсын цолтны эгнээнд өөрийн уран хурц дайчин барилдаанаараа 5 таван орж ирсэнд үнэхээр их баярласан. Ийнхүү Орхон аймаг, Эрдэнэт хотоос анхны улсын цолтой бөх төрөн гарсан юм.

Түүний цолны мялаалга, Хүндэтгэл үзүүлэх ёслолын ажиллагаа “Эрдэнэт үйлдвэр” ТӨҮГ-ын “Хангарьд” спорт хорооны “Хангарьд паласт” есдүгээр сарын 30-ны өдөр болсон юм. Ө.Батзулийн хувьд “Эрдэнэт үйлдвэр”-ийн энэхүү “Хангарьд” спорт хорооны зааланд зургаадугаар ангийн жаахан хүү байхаа “Би бөх болно оо” хэмээн  орж ирсэн гэдэг. Түүнийг их спортод хөтөлсөн хүн нь спортын мастер дасгалжуулагч н.Идэрсайхан.

“Эрдэнэт үйлдвэр”-ийн бөх, улсын начин, Орхон аймгийн уугуул Ө.Батзулын начин цолны мялаалгад зориулсан үндэсний бөхийн барилдаанд улсын заан Нэгдэлийн Жаргалбаяр, улсын харцага н.Золбоо тэргүүтэй 64 бөх зодоглов. Мөн өсвөрийн 32 бөхийн барилдаан болсон юм.

Энэ үеэр шинээр улсын цол хүртсэн нутгийнхаа анхдагч хүүд Орхон аймгийн удирдлага хоёр өрөө байрны батламж гардуулсан юм.

Энэ үеэр “Эрдэнэт үйлдвэр” ТӨҮГ-ын дэргэдэх “Энэрэл” төвийн хүүхдүүд Ө.Батзул ахдаа ая дууны мэнд дэвшүүлж, Эрдэнэтийн бүжигчин залуус “Хангарьд”-д вальс бүжиг бүжин сонирхуулав.