“Эрдэнэт үйлдвэр” ТӨҮГ-ын Ерөнхий захирал Г.Ёндон ажлаа аваад багагүй хугацаа өнгөрсөн. Энэ хооронд үйлдвэрийнхээ хамгийн том нэгжээс эхлээд хамгийн жижиг цехээр орж бодит байдалтай газар дээр нь очиж танилцан ажиллаж байгаа тухай “Erdenettoday.mn” сайт болон бусад мэдээллийн хэрэгслээр харж, үзэж болно. Мөн Нийгмийн цехүүдийн ажилтай ч танилцаж амжсан.

Саяхан Ерөнхий захирал Г.Ёндон Ерөнхий захиргааны газар, хэлтсүүдийн удирдлагатай уулзалт хийсэн байна. Энэ үеэрээ тэрбээр “Миний бие удирдлагууд, ажилтнуудынхаа  санаа бодлыг сонсож, бие биеэ хүндэтгэж, ойлгож хамтран ажиллахыг хүсч байна” хэмээсэн юм. Эндээс харвал Г.Ёндон захирлын хувьд “Эрдэнэт үйлдвэр” ТӨҮГ-ын Ерөнхий захирлаар ажиллах хугацаандаа баримтлах зарчим бол Хүндэтгэл, Ойлголцол тэгээд Хамтын ажиллагаа юм байна гэсэн ойлголтыг сэтгүүлч миний хувьд авлаа.

Аймаг, орон нутгийн удирдлага сонгуулиар солигдсоны дараа “Сонгуулийн мөрийн хөтөлбөрөө амьдралд хэрэгжүүлнэ” хэмээн зарладаг. Түүн шиг Г.Ёндон захирлын хувьд дэлхийд данстай, 6800 гаруй уурййачинтай нэг баг болон ажиллахдаа дээрх зарчмыг баримтлахаа мэдэгдсэн нь аргагүй л төрийн сайдаар ажиллаж байсан хүний зангараг. Түүгээр ч үл барам баримтлах Зарчим нь илүү ойлгомжтой, нээлттэй, ил тод байх нь гэдгийг уурхайчид гэлтгүй энгийн иргэн ч ойлгож болохоор.

Хэн нэг хүн “Ийм том үйлдвэрийн удирдлагаар ирж байгаа хүн тоо ярих ёстой. Эсвэл цалинг тэдэн хувиар нэмнэ гэж амлах учиртай” гэж бодож болох байх. Гэхдээ Монгол улсын хүнд хэцүү цагт хамгийн том ачааг нуруун дээрээ үүрч ирсэн 6800 гаруй уурхайчныхаа хүнд хүчир хөдөлмөрийг сайн мэдэхийн хувьд ч хамгийн түрүүнд Хүндлэл, Ойлголцол, тэгээд Хамтын ажиллагаа чухал гэдгийг тэр сайн мэдэрсэн учраас баримтлах зарчмаа ийн зарлаж байгаа хэрэг. Уурхайчид түүний үгийг анхаарлатай сонссон, үзсэн, дуулсан. Бүр зарим нэг танил нөхөр, “Манай Ерөнхий захирал чинь учиргүй даргархаад, ихэрхээд байхгүй хүн байх нь” гэж ирээд л ярих. Одоо ч тэгээд хуучин нийгмийн үе шиг дарга-ажилтны байр сууринаас ярих гэвэл бүтэхгүй л дээ. Харин  уурхайчин, уурхайн Ерөнхий захирлын харилцаа нь Хүндэл дээр суурилж, Ойлголцлоор үргэжлэн, Хамтын ажиллагааны үр дүнд Амжилт гаргах явдал л хамгийн чухал. Үүнийг л Ерөнхий захирал Г.Ёндонгийн хувьд мэдэрч ийнхүү өөрийн баримтлах зарчмаа уурхайчин хамт олондоо дуулгасан нь хөндөхгүй байхын аргагүй, сонирхохгүй байх сэдэв биш байлаа.     Гэрэл зургийг "Erdenettoday" .mn-ээс.