Иргэн, аж ахуйн нэгж байгууллага хэрэглэсэн дулаан, цахилгаан, халаалтынхаа мөнгийг тухай бүрд нь төлөхгүй тохиолдолд алданги тооцуулдаг. Гэхдээ алдангийг ямар үндэслэлээр хэрхэн тооцож байгаа нь иргэн, аж ахуйн нэгжийнхэнд ойлгомжгүй байдаг. Тэгвэл “Эрдэнэтийн Дулааны цахилгаан станц”-ынхан алдангийг ингэж тооцдог байна. Хэрэглэгч хэрэглэсэн эрчим хүчнийхээ төлбөрийг тухайн сардаа багтаан төлөх үүрэгтэй. Хэрэв хугацаандаа төлөөгүй бол алданги ногдуулдаг аж. Ингэхдээ, төлбөрөө нэг сарын дотор төлөөгүй бол алдангийг 0.1 хувиар,

1-2 сарын тодор төлөөгүй бол 0.2 хувиар

2-3 сарын дотор төлөөгүй бол 0.3 хувиар

3-4 сарын дотор төлөөгүй бол 0.4 хувиар

4-өөс дээш сар төлөөгүй бол 0.5 хувиар тооцдог байна. Энэ тооцооллыг хийхдээ байгууллагынхаа байцаагчдыг давхар хамгаалсан гэнэ. Өөрөөр хэлбэл, ЭДЦС-ын байцаагч Баатар хэрэглэсэн эрчим хүчнийхээ төлбөрийг хугацаанд нь төлөөгүй Доржийн төлбөр тооцоон дээр дур мэдэн 0.5 хувийн алданги тооцохгүй юм. Дээрх хуваарийн дагуу алданги тооцдог байна. Нөгөөтэйгүүр танил талдаа 0.1 хувийн алданги бичээд танихгүй хэрэглэгч Сүхийг 0.5 хувиар “шийтгэх” байцаагчийн ашиг сонирхлыг журмаар ийнхүү хааж өгсөн нь иргэдэд  чиглэсэн ажил болжээ. Аймгийн ИТХ, түүний Ажлын албанаас арваннэгдүгээр сарын 22-нд “Иргэдийн оролцоо-Төлөөлөгчийн манлайлал-Төрийн үйлчилгээ” өдөрлөгийг Баян-Өндөр сумын Спорт зааланд зохион байгуулсан. Энэхүү өдөрлөгт оролцсон “ЭДЦС” хувьцаат компанийнхан алдингиа хэрхэн тооцдог тухай мэдээллийг иргэдэд өгч байсан нь хамгийн чухал, хэрэгцээтэй мэдээлэл байлаа. Тус байгууллагын иргэдэд зориулж гаргасан “Хэрэглэгчийн гарын авлага” хамгийн хэрэгцээтэй мэдээллийг агуулжээ.