Аймгийн Засаг даргын шуурхай ширүүхэн болов. Хотын захирагчийн албаны зүгээс ажлаа хийж чадахгүй байгаа, хийхгүй байгаа Мэргэжлийн байгууллагыг хатуухан шүүмжлэв. “Эрдэнэт Усынхан энэ долоо хоногт 5, 3 дугаар сургуулиуд, Залуучуудын ордон, нэгдүгээр цэцэрлэг зэрэг төрийн байгууллагуудын эхний ээлжинд халаах асуудлыг шийд” хэмээн Хотын Захирагчийн албаны дарга Эрдэнэт Усынханд үүрэг өглөө.

Эрдэнэт усынхан ч ажилдаа хариуцлагагүй ханддаг, ажлаа мэддэггүй, ам ажлын зөрүүтэй байдал байдаг талаар шуурхайд мэдээлэл хийсэн Захирагчийн албаны дарга хатуухан шүүмжилсэн. Тэр ч бүү хэл Эрдэнэт усынхан нэгдүгээр сургуулийг халаана, зөвлөх үйлчилгээ үзүүлнэ гээд төсвөөс 100 сая төгрөг гаргуулж авчихаад өнөөг хүртэл үр шимийг нь үзүүлж чадахгүй байгаа ажээ. Нөхцөл байдалтай танилцахаар очсон ажлын хэсгийнхэнд өнөөх 100 сая төгрөгөөр ажил хийнэ гэсэн нөхөд нэгдүгээр сургуулийн өргөтгөлийг барьсан гүйцэтгэгч компанийг буруутгасан тайлбар хийдэг гэнэ.

Энэ юу ч биш. Баянцагаан багийн 12 айл өрхийн халаалт шугамыг өргөтгөнө. Энэ шугамыг өргөтгөчихвөл  бүх асуудал ОК болно. Ердөө  24 сая төгрөг л гаргаад өгчих.  Хоёрхон хоногийн дотор маналзуулаад өгнө гээд татвар төлөгчдийн мөнгийг яаралтайгаар гаргуулан авчээ. Аймгийн Засаг даргын орлогч шийдвэр гаргаж нөөц хөрөнгөнөөс санхүүжилтийн асуудлыг яаралтай шийдсэн байна. Гэтэл хоёр хоног байтугай 7 хоночихоод байхад Баянцагааны 12 айлын халаалтын асуудал шийдэгдээгүй хэвээр байгааг аймгийн Засаг даргын шуурхайд суусан дарга нар, албан хаагчид сонсоод нүд нь орой дээрээ гарах дөхсөн юм. Зарим нэг нь “Эрдэнэт усын инженер техникийн ажилчид албан тушаалтнуудтайгаа нийлж байгаад зуу зуун саяар нь хийсэн ажлынхаа тайланг нээлттэй тавих хэрэгтэй” гэж ирээд л нуг нуг хийх. Төрийн мөнгө ёолдоггүй, гэдэг энэ.  Татвар төлөгчдийн мөнгийг захиран зарцуулах зуун эзэн байдаг ч шалгадаг, нягталдаг нэг ч хүн байдаггүй учраас ийм байдал мэргэжлийн байгууллагад газар авчээ.