Эрдэнэт хотноо болж буй уурхайчдын спортын наадам хөл хөдөлгөөн ихтэй, өргөн дэлгэр болж байна. Энэ үеэр гадна дотноос ирсэн улс төдийгүй Эрдэнэт хотыг дайран өнгөрч хоноглохоор буудал хайж байгаа иргэдэд хүндхэн байна. Учир нь Эрдэнэтийн буудлууд пиг дүүрч люкс төдийгүй энгийн өрөө хайсан иргэд цөөнгүй таарч байлаа. Бүр зарим нэг төрийн байгууллагын алба хаагчид томилолтоор Эрдэнэт ирсэн ч хоноглох буудал олдохгүй учраас Булган аймгийг зорьж байхтай ч таарсныг нуух юун. Ийм л өргөн дэлгэр спортын наадам уурхайчдын дунд өрнөж уурхайчид үүрд хадгалах цомын төлөө ширүүхэн өрсөлдөж байгаа нь эрдэнэтчүүдэд чухам л загатнасан газар нь маажих шиг л болж байх шиг. Эрэгтэйчүүдийн сагсан бөмбөгийн тэмцээн тун ширүүн өрсөлдөөнтэй болж байна. Баасан гарагийн үдэш хагас шигшээд шалгарахын төлөөх гал гарсан тоглолтууд болсон. Дараа нь хагас шигшээд шалгарсан багууд аваргын төлөө тоглох эрхээ авахын төлөөх халуухан өрсөлдөөнүүд өрнөсөн юм.

Тэдний нэг нь энэ үдэш болсон  “Ачит Ихт” компанийн баг “Blast” багтай хийсэн тоглолт байлаа. Тоглолтын эхнээс л ширүүхэн өрсөлдөж анхны оноог “Blast” баг авав. “Ачит Ихт”-ийнхэн хариуг нь төд удалгүй барьж торгуулийн шидэлтээс 1 оноо авсан юм. Энэ удаагийн тоглолтод “Ачит Ихт” багийн 13 дугаартай тамирчны 3 онооны шидэлт байндаа тусч түүний хэрээр багийнхаа оноог ахиулж байлаа. Нөгөөтэйгүүр “Blast”-ийнхан ч техникийн алдаа гаргаж түүнээс нь “Ачит Ихт” багийнхан оноо түүж, тоогоо ахиулсаар. Тоглолтын эхний 3 минутад “Ачит Ихт” баг тоогоор тасарч 13:4 оноогоор илүүрхэж байв. “Blast”  багийн дасгалжуулагч тамирчиддаа оновчтой зөвлөгөө өгсөний үр дүнд оноог ахиулж эхэллээ. Улмаар тоглолтын нэгдүгээр үе өндөрлөхөд 23:20 болгож “Blast” баг оноог ойртуулав.

Тоглолтын хоёрдугаар үе дундаа орж байхад хоёр багийн тооны харьцаа 28:29 болов. “Ачит Ихт” тал бөмбөгөөр л илүүрхсэн хэвээр. Оноо ойрхон ийм үед тамирчид бөмбөгний төлөө юу чаддагаа харуулж байлаа. “Ачит Ихт” багийн хөгжөөн дэмжигчдийн уухай, нүргээн “Хангарьд” паласыг доргиож, тамирчид нь ч гялалзаж байсан юм. Тоглолтын цаг дуусахад 2 минут үлдсэн байхад “Blast” багийн холын зайн шидэлт амжилттай болж 3 оноо авснаар тооны харьцаа 38:37 болов. Тэд оноогоор илүү гарч эхэллээ. Нэг их удалгүй “Ачит Ихт” дундын зайнаас амжилттай довтолсноор 2 оноо авч тоог 38:39 болгов.

Энэ давамгайллаа тэд хадгалсаар дахин 2 оноо, дээр нь нэмж 3 оноо авснаар 44 оноотой болж илт илүүрхэх үед тоглолтын цаг дууслаа. Харин “Blast” баг сүүлчийн мөчид 2 оноо авч 40 оноотойгоор тоглолтоо өндөрлүүлэв. Ийнхүү “Ачит Ихт” баг уурхайчдын спортын наадмын эрэгтэй сагсан бөмбөгийн төрөлд аваргын төлөө тоглохоор шалгарсан юм. Магадгүй тэд энэ эрчээрээ, хөгжөөн дэмжигчдийнхээ хүчээр явбал аваргын алтан медаль авчихаад зогсож байхыг үгүйсгэх аргагүй байлаа.