Аймгийн ИТХ-ын Зөвлөлийн хуралдаанаар Олон нийтийн цагдаагийн орон тоо, төсвийн талаар хэлэлцэв. Олон нийтийн цагдаагаар ажилладаг иргэн цалин биш Урамшуулал л авдаг байна. Өнөөдрийн байдлаар тэд 503 мянган төгрөгийн нэрлэсэн урамшуулалтай  татвар, хураамжаа суутгуулаад гар дээрээ 300 гаруй мянган төгрөг авдаг нь амьдрал ахуйд нь хүрэлцдэггүй учраас тогтвортой ажилладаггүй, өөр ажилд шилжих ажлаас гарах үзэгдэл түгээмэл байдаг ажээ. Энэ асуудалд аймгийн ИТХ-ын дарга Д.Мөнхбат “Би хувь төлөөлөгчийнхөө зүгээс санал оруулна. Орон тооны хувьд бууруулмааргүй байна. Төвийн болон алслагдсан баг, сургуулийн орчимд Олон нийтийн цагдаа ажиллуулах зайлшгүй шаардлага байгаа. Өнөөдрийн авч байгаа урамшуулал тэдний амьдрал ахуйд хүрэхгүй байгаа нь үнэн. Дээр нь хөдөлмөрийн хөлсний доод хэмжээ өөрчлөгдөж байгаа. Сая Цагдаагийн дарга Амарсайхан орон тоог 30 болгоод урамшууллыг 670 мянгад хүргэвэл Олон нийтийн цагдаа гар дээрээ 550 мянган төгрөг авах тооцоог танилцууллаа. Ахиад нэг харвал гаргалгаа байна. Олон нийтийн цагдаагийн орон тоо, цалингийн санг манай аймгийн төсөв даана шүү. Тиймээс танай байгууллагын нягтлангийн зүгээс дахиж тооцоолол оруулж ир. Бүр 700, 800 мянган төгрөгийн урамшуулалтай болговол Олон нийтийн цагдаа гар дээрээ хэдэн төгрөг авах, НДШ, ХХОАТ-т хэдэн төгрөг хувиасаа өгдөг байх. Танай байгууллагаас хэдэн төгрөг төлөх тооцоо судалгааг оруулж ир. Шийдэх боломж байгаа. Үнэхээр авч байгаа урамшуулал нь хаанаа ч хүрэлцэхгүй байхад хэн энд ажиллах вэ. Энэ асуудлыг энэ сарын 22-нд болох ээлжит XII хуралдаан дээр танилцуулж, шийднэ” гэлээ.