Орхон аймгийн Газрын харилцаа, барилга, хот байгуулалтын газар “Нээлттэй хаалганы өдөр” зохион байгуулж байна. Энэ удаагийн нээлттэй хаалганы өдөр ихээхэн онцлогтой байжээ. Өмнө нь аймгийн хэмжээнд төрийн байгууллагууд ийм өдөр, өдөрлөгийг тухайн байгууллага дээр эсвэл Амарын талбайд зохиосон ч тэр бүр зорилтот иргэнд хүрч чаддаггүй байв. Тэгвэл энэ удаад Газрын харилцаа, барилга, хот байгуулалтын газрынхан зорилтод бүлгийнхэндээ хүрч ажиллахын тулд гэр хорооллын багуудад “Нээлттэй хаалганы өдөр”-ийг зохиож байна.

Тус газрынхан аравдугаар сарын 31-нээс арваннэгдүгээр сарын 1-ний хооронд Наран, Цагаанчулуут, Рашаант, Уртын голын иргэдэд газартай холбоотой үйлчилгээг иргэдэд хүргэсэн. Арваннэгдүгээр сарын 2-3-ны өдөр Даваат, Шанд багийн иргэдэд төрийн үйлчилгээг хүргэх зорилгоор “Аялгуу” соёлын төв дээр “Нээлттэй хаалганы өдөр”-ийг зохиож байна. Ингэхдээ Газрын албаныхан Баян-Өндөр сумын ЗДТГ-ынхан болон Татварын хэлтэс, Улсын бүртгэлийн хэлтэстэй хамтран ажилласан нь иргэдийг чирэгдэлгүй, нэг дороос төрийн үйлчилгээг авах боломжийг бүрдүүлсэн байна.

Газрын албанаас энэ сарын 11-нийг дуустал ийнхүү тодорхой хуваарийн дагуу багуудаар дамжуулан төрийн үйлчилгээг хүргэж байна. Тухайлбал,

• Кадастрын зураг авах
•  Газрын цахим шинэчилсэн бүртгэлд бүртгүүлэх
•  Газрын төлбөр цахимаар төлөх
• 2023 оны газар зохион байгуулалтын төлөвлөгөөнд санал өгөх
• Газар эзэмших гэрээ, гэрчилгээгээ хэвлэн авах
• Эзэмшил газраа өмчлөх хүсэлт өгөх
• Үнэгүй газар өмчилсөн лавлагаа авах
•  Газрын төлөв байдал, чанарын хянан баталгааны мэдэгдэх хуудас авах
• Газар өмчилж аваагүй тодорхойлолт авах зэрэг үйлчилгээг үзүүлж байна.

Харин тэдэнтэй хамртан ажиллаж байгаа Татварын хэлтсийнхэн

•  ebarimt апп-аар газрын төлбөр төлөх
• Үл хөдлөх хөрөнгө борлуулсны орлогоос суутгасан 2%-ийн албан татварын нэхэмжлэх үүсгэх 
• Сугалааны тохирол явуулах зарчим
• Сугалааны урамшууллын хэмжээ
• Өсөлтийн хувь хэмжээ /байршлын урамшуулал/
• ebarimt хэрэглэгчийн бүртгэл үүсгэх, сэргээх
• Хэрэглэгчийн мэдээлэл засварлах
• Нууц үг сэргээх

зэрэг үйлчилгээг Даваат, Шанд багийн иргэдэд үзүүүлж байв. Үүнээс гадна “Нээлттэй хаалганы өдөр”-т ажиллаж байгаа Татварын хэлтсийн мэргэжилтнүүд Иргэнд татвараа төлөх хамгийн хялбар, байж болох бүхий л хувилбар, аргачлалыг зааж, утсан дээр нь суулгаж өгч байна. “Хас”, “Хаан” банкны аппликэйшн ашиглан татвар төлөх заавар, хуулийн этгээд шинээр байгуулж буй бол Татварын хэлтэст хэрхэн хандах тухай, Е-баримтны сугалаанаас хонжвор хожсон бол хэрхэн хонжвороо авах талаар, Орон сууцны хөнгөлөлтөд хэрхэн хамрагдах тухай гарын авлагыг иргэдэд тарааж өглөө. Гэр хорооллын иргэдийн хувьд төрийн үйлчилгээг бараг л гэрт  ирсэн дээр нь гээд 6, 8 нэрийн дэлгүүр ажиллуулж буй иргэн ч татвартай холбоотой асуудлаар хандаж байв. Иргэд ч төрийн  тэр дундаа Газар, Татвартай холбоотой үйлчилгээ гэрийнхээ дэргэд, хажууд нь ирсэнд талархаж “Явдал чирэгдэлгүй үнэхээр амар юм байна” гэж ам сайтай байлаа.