Аймгийн Цагдаагийн газрын Замын цагдаагийн тасагтай хамтран өнгөрөгч баасан гарагт “Уусан бол бүү жолоод” аяны хүрээнд шөнийн сурвалжлага бэлтгэлээ. Баасан гараг нь намрын дунд сарын дашням, балжинням давхацсан өдөр байсан нь жинхэнэ утгаараа “баасан ахын төрсөн өдөр” тохиосон гэхэд болно. Бид үдшийн 21.00 цагт  Их залуу багийн нутаг 15 дугаар сургуулийн өмнө зам дээр согтуугаар машин жолоодсон гэх дуудлагын дагуу очлоо. Энд нэг зүйлийг онцлох хэрэгтэй. Хүний эрх, холбогдох хууль тогтоомжийн хүрээнд согтуугаар тээврийн хэрэгсэл жолоодсон иргэний нүүр царайг ил гаргах гээгүй, нэр усыг нь ч асуугаагүй. Гагцхүү улсын хэмжээнд тухайн өдөр өрнөсөн “Уусан бол бүү жолоод” аяны хүрээнд Замын цагдаагийн алба хаагчдын ажлыг сурвалжлахыг зорьсон юм.

Бидэнтэй хамт Орхон аймгийн Цагдаагийн газрын Замын цагдаагийн тасгийн 40 гаруй алба хаагч, Замын цагдаагийн байцаагч, цагдаагийн ахмад Э.Өлзийсүрэн нар ажилласан. Эхний дуудлагад очиход “Дүүгийнхээ хүүхдийн үсний найранд очоод хоёр шаазан айраг уучихлаа. Уучлаарай” гэсэн жолоочтой таарлаа. Цагдаагийн ахмад Э.Өлзийсүрэнгийн драгер багажаар үлээлгэж шалгахаар гялгар ууттай үлээгчийг шинээр задалж, иргэнд танилцуулав. Мөн драгер багаж хэрхэн ажилладаг талаар болон үлээгч иргэн тасралтгүй 5 секунд үлээдэг тухай нэгбүрчилсэн тайлбар, санамж өгч байлаа.

Үйлдвэр, уурхайд ажиллахаар гарч байгаа ажилтнуудад Хөдөлмөрийн аюулгүй байдлын зааварчилгаа өгч байгаатай эгээтэй л адил гэсэн үг. Өнөөх иргэн 5 секунд хүргэж чадалгүй амьсгаагаа тасалж дахин үлээх шаардлага тулгарав. Харин хоёр дахь удаагийн үлээлт амжилттай боллоо. Драгерын дэлгэц дээр “Түр хүлээнэ үү” гэсэн бичиг гарч ирэв. Хэсэг хугацааны дараа дэлгэц дээр 0.87 хувийн согтолт гэсэн мэдээлэл гарч ирснээр согтолтын зэргийг тогтоолоо. Байцаагч Э.Өлзийсүрэнгийн зүгээс “Та яагаад архи, согтууруулах ундааны зүйл хэрэглэсэн үедээ жолоо барьж байгаа юм бэ. Архи уусан үедээ жолоо барихыг хориглосон хууль байдгийг мэдэх үү. Та юу уусан бэ” хэмээн асуулаа. Өнөөх иргэн ”Би дүүгийнхээ хүүхдийн үсний найранд ороод хоёр шаазан айраг л уусан. Гэр энүүхэнд болохоор машин барьчихлаа” хэмээн тайлбар хийв. Цагдаагийн ахмад Э.Өлзийсүрэнгийн зүгээс хөдөлгөөн зохицуулагч цагдаад ачлагын машин дуудахыг үүрэгдээд “Маргааш өглөө 10.00 цагт Замын цагдаагийн тасагт ирээрэй” гэж хэлээд үнэмлэх бичиг баримтыг хураан аваад хөдөлсөн юм. Энэ шөнө гэр хорооллын замд согтуугаар тээврийн хэрэгсэл жолоодож яваад баригдсан нөхдүүд дашням, балжиннямтай өдрийг бараг буруутган “Хоёр шаазан айраг уусан” хэмээн өөрийгөө өмөөрч байлаа.

Харин “Сансар” худалдааны төвийн баруун арагш эргэсэн зам дээр гарсан зохицуулагчаас ирсэн дуудлагын дагуу очиход 30 гаруй насны эмэгтэй шуудхан  үнэнээ өчсөн нь эрчүүдээс илүү хаттай юм даа гэх сэтгэгдэл төрүүлсэн. Тэрбээр “Найзтайгаа 2,3 шил пиво уусан, Уучлаарай” гэлээ.

Бид цагдаагийн ахмад Э.Өлзийсүрэнгийн машинд хамтдаа явсан. Түүний ажил  “үстэй толгойноос их”. Станцаар ирж байгаа дуудлага бүрд хариу өгнө, хаана явж байгаа, хэзээ очихоо дуулгана. Дээр нь зам дээр зохицуулалт хийж байгаа Замын цагдаагийн зохицуулагч нараас ажлынхаа тухай утсаараа зураг дарж, дотоод сүлжээгээр ирүүлэхийг үүрэгдэнэ. Ирсэн зургуудаа заримыг нь Нийслэл рүү илгээнэ. Тэр их ажлынхаа хажуугаар ажлаа муу хийж байгаа, сэтгэлгүй зарим нэг зохицуулагч нарыг “илрүүлж” үүрэг даалгавар өгнө. Үүрэг авсан зарим зохицуулагч машиндаа сууж байхтай ч таарлаа. Бид 01.30 цаг хүртэл дөрвөн цаг гаруйн хугацаанд 30 шахам согтуу жолоочийг илрүүлэн саатуулсан юм. Мөн 10 гаруй иргэн жолоо барих эрхгүй байж машин жолоодсон тул тээврийг хэрэгслийг нь саатуулав. Нийтд 29 согтуу жолоочийг илрүүлж өөрийнх нь амь нас, эд хөрөнгийг аврах хамгаалахын зэрэгцээ бусдын амь нас, эрүүл мэндийг эрдэлд оруулахаас хамгаалж ажилласан Замын цагдаа нарын ажил үнэхээр хүнд, ачаалал их байдаг аж. Шөнө замын голд дохиураа бариад зогсож байгаа замын цагдааг харсан жолооч замын хашлага даван шороон замаар ороод зугатах нь энүүхэнд. Зугатсан жолоочийн явсан чигт байгаа мөрдэс нэгтнүүддээ станцаар  хэл дуулгана, нэг нь араас нь хөөнө. Бүр зарим нэг иргэн дөхөөд ирэнгүүт нь машинаа хаяад гэр хорооллын гудамжинд архи уусан явган хүний дүрд шууд д чадварлаг аргагүй нь хувирна. “Хошин шог” цаашаа л юм болно. Цагдаагийн ахмад Э.Өлзийсүрэн, түүний хамтрагчид 02.00 цаг өнгөрч байхад ч эргүүл, хяналтын ажлаа хийсээр үлдсэн юм.