Засгийн газраас Улаанбаатар хотын төвлөрөлийг буруулах чиглэлээр олон ажил хийж байгаа. Хамгийн сүүлд энэ сарын 14-нд Ерөнхий сайдын захирамжаар “Улаанбаатар хотоос хөдөө орон нутагт шилжин суурьших иргэд, аж ахуйн нэгжийг дэмжих, санал боловсруулах ажлын хэсэг”-ийг байгуулсан. Ажлын хэсэг цахимаар анхны хуралдаанаа хийж Ерөнхий сайд Л.Оюун-Эрдэнэ оролцон аймаг, орон нутгийн удирдлагуудад үүрэг өглөө.

Санааг нь дэмжиж байна, гэхдээ бидэнд асуудал байгаа гэдгийг мартаж болохгүй. Нэгдүгээрт, манай аймгийн хувьд газар нутаг хамгийн багатай. Нийтдээ 84.5 мянган га газар нутаг дээр албан бус тоогоор 106 мянга гаруй хүн амьдардаг. Дээр нь албан ёсоор шилжиж ирээгүй, Эрдэнэтийн зах зээлийг бараадан хөрш зэргэлдээх аймаг орон нутгаас  амьжиргаагаа залгуулахаар ирсэн иргэдийг оролцуулбал 120 гаруй мянган хүн амьдарч байгаа.  Дээрх 84.5 мянган га нутаг дэвсгэрийн 67 хувийг нь Жаргалант сумын нутаг эзэлдэг. Үлдсэн 33 хувь буюу 27 мянга 827 га нутаг дээр 100 гаруй мянган хүн чихэлдэн амьдардаг. Бүр нарийвчилмаар санагдана. Эрдэнэтийн 27.8 мянган га нутаг дэвсгэр Монголын нийт нутгийн 0.054 хувь нь шүү. Хумсны толион чинээ газар гэсэн үг. Энэ жаахан газар нутаг дээр амьдарч байгаа 100 гаруй мянган эрдэнэтчүүд Монголын нийт хүн амын 3.5 хувийг эзэлдэг. Эндээс харвал бид 27.8 мянган га нутаг дээрээ, нэмээд 100 гаруй мянган иргэн дээрээ Улаанбаатараас хөдөөг зорих нүүдлээс хэдийг нь шингээх боломж байгааг эрх баригчид тооцохгүй байна.

Засгийн газар Улаанбаатар хотын төвлөрөлийг бууруулах чиглэлээр бодлого боловсруулж  байгаа. Нийслэлд 1 ам дөрвөлжин метр газарт 3.03 хүн амьдардаг. Тэгвэл Эрдэнэтэд хэд байдаг гээч. Нэг шоо мерт газарт 4.26 хүн чихэлдэн амьдарч байгаа. Улаанбаатараас их нүүдэл хөдөлбөл нэг жилийн дараа Эрдэнэтэд нэг ам метр газарт 5 хүн амьдрах статистик гарч мэднэ. Иймд Орхон аймаг, Эрдэнэт хотын газар нутаг, хилийн цэсэд өөрчлөлт оруул. Улаанбаатар хотоос нүүн ирэгсэд Жаргалант сумын нутагт бүгд ирэхгүй нь ойлгомжтой. Зах зээл, хөгжил, банк санхүү, сургууль, цэцэрлэгээ бодоод Эрдэнэтийн хонхорт л төвлөрнө. Дээр нь Эрдэнэт хотын иргэдийн 20 хүрэхгүй хувь нь нэг удаа үнэгүй олдох хашааны газраа өмчилж авсан байдаг. Үлдсэн 80 шахам хувьд нь хашааны 0.07 га газар хайгаад ч олдохгүй байгаа. Өнөөдрийн байдлаар Орхон аймгийн Баян-Өндөр сумын Засаг даргад, газрын албанд хашааны 0.07 га үнэгүй газраа авах гэсэн 22 мянга гаруй өргөдөл бий гэдэг. Баян-Өндөр сумын Засаг дарга яаж ч хичээгээд жилдээ дээрх 22 мянган иргэний өргөдлийн 1 хувийг ч шийдэж чаддаггүй. Ийм байхад Эрдэнэтийг зорьж Улаанбаатараас ирсэн иргэд хашааны 0.07 га газраа өмчилж авна гэдэг ёстой Зангууны үлгэр. / Үргэжлэл бий.../