Манай аймагт энэ сарын 01-ээс 08-ны өдрүүдэд зохион байгуулагдсан Гамшгаас хамгаалах иж бүрэн сургууль өндөрлөж дүүрэн хангалттай буюу “Онц” дүгнэгдлээ. 
Монгол Улсын Шадар сайдтай Орхон аймгийн Засаг даргын байгуулсан гэрээний хэрэгжилтийг хангуулах хүрээнд Онцгой байдлын ерөнхий газраас манай аймагт гамшгаас хамгаалах иж бүрэн сургууль зохион байгуулагдлаа.  17:00 цагт дадлага сургуулийн дүнгийн хурлыг хийж сургуулийн удирдагч ОБЕГ-ын дэд дарга, бригадын генерал Б.Ууганбаяр дүнгээ танилцуулсан юм. 

      Түүнчлэн аймгийн бүх шатны Засаг дарга, Онцгой комисс, орон нутгийн гамшгаас хамгаалах алба, мэргэжлийн ангийн бие бүрэлдэхүүн ажиллаж, гамшгаас хамгаалах төлөвлөгөөгөө тодотгож чадсан үр дүнтэй дадлага сургууль болсон талаар онцолсон юм. Хурлын үеэр шинэчлэн баталсан Орхон аймгийн гамшгаас хамгаалах төлөвлөгөөг аймгийн Засаг дарга С.Батжаргалд хүлээлгэн өглөө. 
      Тэрээр: “Гамшгийн бэлэн байдлын төлөвлөлтийн баримт бичгийг бодит байдалд нийцүүлэн батласанд баяр хүргэж, төлөвлөлтийн баримт бичиг сейфэнд хадгалдаг биш, амьд байх хэрэгтэй. Орхон аймгийн нутаг дэвсгэрт аюул, осол тохиолдоход аймгийн хүч хэрэгсэл эхний хариу арга хэмжээг хамтарч хэрэгжүүлэх чадвартай болно. Энэ том үр дүн” гэв. 
        Аймгийн Засаг дарга С.Батжаргал: Гамшгаас хамгаалах иж бүрэн төлөвлөгөөгөө боловсруулж, хамтран ажиллаж, нэг санаа, нэг зүтгэлтэй байсан мэргэжлийн ангиуд, төрийн албан хаагч, сургалт дадлагыг зохион байгуулсан бие бүрэлдэхүүнд онцгойлон баяр хүргэлээ. 

Эх сурвалж: Мэдээллийн төв