Есдүгээр сарын 1-н болж 2022-2023 оны хичээлийн жилийн нээлт орон даяар боллоо. Энэ удаагийн хичээлийн шинэ жилийн нээлт ихээхэн онцлогтой болсон юм. Цар тахлын дэгдэлтээс үүдэн сүүлчийн хоёр ч хичээлийн жилийн нээлтийг албан ёсоор, ёслол төгөлдөр тэмдэглээгүй. Энэ удаад Монгол орон даяар хичээлийн шинэ жилийн нээлтээ хийж сурагчид танхимаар хичээллэж эхэллээ. Мөн Монгол улсын Ерөнхийлөгч Ухнаагийн Хүрэлсүхийн 2022 оны 7 дугаар сарын 11-ний 159 тоот зарлигийг хэрэгжүүлж Эзэн Богд Чингис хааны эш хөргийг өмчийн хэлбэр харгазлахгүйгээр, Монгол улсын бүх шатны боловсролын байгууллага хүндэтгэлтэйгээр залсан юм.

Манай аймгийн Боловсрол, шинжлэх ухааны газар, аймгийн ЗДТГ-ын НББ-ээс Чингис хааны эш хөргийг сургууль, цэцэрлэгт залах ажилд ач холбогдол өгч аймгийн болон Баян-Өндөр сумын ИТХ-ын төлөөлөгчид Ерөнхийлөгчийн зарлигийг уншиж танилцуулав. Биднийг Лаборатори VIII сургуулийн хичээлийн шинэ жилийн нээлтэд оролцоход тус сургууль Эзэн Богд Чингис хааны хөргийг хүндэтгэлтэйгээр залав. Монгол улсын Ерөнхийлөгчийн Чингис хааны хөргийг залах тухай Зарлигийг аймгийн ИТХ-ын төлөөлөгч О.Мөнх-Од тус сургуулийн багш сурагчид, ажилчид эцэг эхчүүдэд уншиж сонордуулсан билээ. Түүний дараа тус сургуулийн ахлах ангийн сурагчид Эзэн Богд Чингис хааны хөргийг Хүндэтгэлийн танхимдаа залсан юм. 

МОНГОЛ УЛСЫН ЕРӨНХИЙЛӨГЧИЙН ЗАРЛИГТ:

“Эдүгээгээс 860 жилийн тэртээ дэлхийн түүхийн Мянганы суут хүмүүн Тэмүүжин мэндэлж, төрт ёс, түүх соёл, хууль цаазын дор монгол туургатныг нэгтгэн, өнө эртнээс уламжлалтай төрт улсаа сэргээн мандуулж, Мөнх тэнгэрийн хүчин дор Их Монгол Улсыг байгуулан, Монголын Эзэнт гүрний сүр хүчийг тунхаглан, монгол үндэстний суу алдрыг бадраасан Эзэн Богд Чингис хаан болон өргөмжлөгдөж, дэлхий дахинд Монголын их амар амгаланг тогтоосон билээ.

Эзэн Богд Чингис хааны суу алдар, агуу их түүхэн үйл хэргийг сурвалжлан судлах, түгээн дэлгэрүүлэх, эрхэмлэн дээдлэх, алдаршуулан мөнхжүүлэх, төрт ёсны үнэт өвийг бэхжүүлэх, эв эеийг бататгах үүднээс Монгол Улсын Үндсэн хуулийн Гучин дөрөвдүгээр зүйлийн 1 дэх хэсэг, Монгол Улсын Ерөнхийлөгчийн тухай хуулийн 9 дүгээр зүйлийн 1 дэх хэсгийг тус тус үндэслэн ЗАРЛИГ болгох нь:

Нэг. Эзэн Богд Чингис хааны эш хөргийг монгол төр эрхэмлэн дээдэлж, Төрийн ордонд залсугай.

Хоёр. Төрийн бүх байгууллага, Монгол Улсаас хилийн чанадад суугаа дипломат төлөөлөгчийн газар, бүх шатны сургалтын байгууллагууд Эзэн Богд Чингис хааны эш хөргийг дээдлэн залсугай.

Гурав. Монгол хүн, айл өрх бүр Эзэн Богд Чингис хааны эш хөргийг эрхэмлэн залж, дээдлэн шүтэж байхыг уриалсугай.

Дөрөв. Монгол хүн бүр Их Монгол Улсын гал голомтыг сахиж буйгаа гүнээ ухамсарлан, Эзэн Богд Чингис хааны суу алдар, үйл хэрэг, билиг сургаалыг эрхэмлэн дээдэлж, даган мөрдөж, төрт ёсны үнэт зүйл, өв соёлыг үр хойчдоо өвлүүлэн үлдээж, эв эеэ сахин бататгаж, улс орноо мандуулахад хувь нэмрээ оруулахыг уриалсугай” гэжээ.