Аймгийн Засаг даргын даваа гарагийн шуурхай хуралдав. Шуурхайг аймгийн Засаг даргын орлогч М.Түмэнжаргал удирдав явууллаа. Шуурхайд аймаг, орон нутагт болж байгаа сайнтай суутай олон ажлыг авч хэлэлцдэг, шийдвэр гаргадаг, үүрэг даалгавар өгдөг. Наймдугаар сарын 15-ны шуурхайн эхэнд М.Түмэнжаргал даргын зүгээс хуралд оролцогчдод хандан “Үндэсний спортын долоодугаар их наадамд манай аймгийн баг, тамирчин, дасгалжуулагч, Зохион байгуулах хорооныхон амжилттай ажиллаж багийн дүнгээр тэргүүн байрт шалгарч алтан медаль, цомын эзэн болсонд баяр хүргэе” хэмээсэн. Дараа үүрэг даалгавын биелэлттэй, дарга нарын мэдээлэлтэй танилцсан юм. Шуурхайн төгсгөлд тэрбээр “Иргэдээс багагүй гомдол санал ирж байна. Эрдэнэт цэцэрлэгт хүрээлэнд хурим зохион байгуулсан байна. Хуриманд оролцож идэж уусан, согтуу хөлчүү хүмүүс шүлсээ үсчүүлж, нус цэрээ хаяж, тамхины ишээ энд тэндгүй шидэлсэн гэнэ. Ийм байж болохгүй ээ. Цэнгэлдэх хүрээлэн чинь хурим найрын зориулалтын газар биш. Өөр орчин шүү. Тэгээд ч хүүхэд багачуулын нүдэн дээр согтуу хөлчүү хүмүүс холхисон. Энхбат аа, та тэрхүү хурим найр хийсэн газартайгаа гэрээгээ өөрчил. Дахиж тийм зүйл болох ёсгүй. Хэрэв гэрээгээ өөрчилж чадахгүй бол чаддаг хүнийг нь тавъя. Ахиад ийм асуудал үүсвэл би өөрөө таныг ажлаас халах саналыг аймгийн Засаг даргад оруулна шүү. Бидэнд ажил хийдэг хүн хэрэгтэй” хэмээн хатуухан санууллаа.

Эрдэнэт цэцэрлэгт хүрээлэн эрдэнэтчүүдийн татварын мөнгөөр бий болсон. Хүүхэд багачуул тоглож наадан, спортоор хичээллэж чөлөөт цагаа тав тухтай орчинд өнгөрүүлэх орчин болохоос найман хантай гэр барьсан нэг дураараа аашилдаг нөхөр хурим найрын хүлээн авалт хийгээд, зохион байгуулалттай архи дарсаар үйлчлээд байвал хүүхдүүдэд ямар үлгэр дууриалал үзүүлэх вэ. Тэгээд ч Эрдэнэт цэцэрлэгт хүрээлэн архи, согтууруулах ундаагаар үйлчилдэг газар биш байвал яасан юм бэ.