Энэтхэг улсын Ченнай хотноо болсон дэлхийн шатрын 44 дүгээр олимпиадад оролцож алтан медаль хүртсэн Бат-Эрдэнийн Мөнгөнзулыг эцэг эхийн хамт аймгийн Засаг дарга С.Батжаргал, БТСГ-ын дарга Д.Дэлгэрбаяр нар хүлээн авч хүндэтгэл үзүүллээ. 
       Б.Мөнгөнзул нь Орхон аймаг  Эрдэнэт хотын Байгалийн ухааны гүнзгийрүүлсэн сургалттай 14 дүгээр сургуулийн 12е ангийн сурагч. Анх 5 настайгаасаа шатрын спортоор хичээллэж ирсэн түүний гаргасан амжилт нь Монгол улсдаа анхдагч юм. 

      Хоёр жилд нэг удаа зохион байгуулагдаж, дэлхийн чансаа өндөр тамирчид оюун ухаанаараа өрсөлддөг уг тэмцээнд Б.Мөнгөнзул нь арван өрөг тоглож найм хожиж, нэг тэнцэн, нэг хожигдож 85 хувийн амжилт үзүүлж ширээндээ түрүүлжээ. 
      Түүний гаргасан амжилтыг аймаг орон нутгийн удирдлагууд өндрөөр үнэлж “орлогод нийцсэн орон сууц төсөл”-ийн хүрээнд орон нутгийн хөрөнгө оруулалтаар баригдаж буй орон сууцнаас нэг өрөө байр өгөхөөр шийдвэрлэлээ. Өнөөдөр аймгийн Засаг дарга хүлээн авах үеэрээ батламжийг гардуулан өглөө.