Монгол улсын баатар, хөдөлмөрийн баатар, төр нийгмийн нэрт зүтгэлтэн маршал Ю.Цэдэнбалын хөшөөнд түүний хүү Зориг хүндэтгэл үзүүлж, цэцэг өргөлөө. Ц.Зориг энэ өдрүүдэд “Эрдэнэт үйлдвэр” төрийн өмчит үйлдвэрийн газрын удирдлагуудын урилгаар зочилж байгаа ажээ. Тэрбээр энэ удаад өөрийн гэргийн хамт Монгол улсад ирсэн байна.

Тэрбээр  Маршал Ю.Цэдэнбалын хөшөөнд хүндэтгэл үзүүлж, цэцэг өргөснийхөө дараа хэвлэлийнхэнд сэтгэгдлээ хуваалцсан юм. “Би үнэхээр сэтгэл хөдөлж байна. Миний аав Цэдэнбалын хөшөө Монгол орны олон газарт байдаг. Эрдэнэт үйлдвэрийн өмнө сүндэрлэсэн аавынхаа хөшөөг хараад баярлаж байна. 40 гаруй жилийн өмнө Эрдэнэт үйлдвэрийг байгуулах ажлыг эхлүүлж байсан аавын минь үйл хэргийг мөнхөлж их сайхан хөшөө босгожээ. Би сая Монголд ирэхийнхээ өмнө аавынхаа тухай, өөрийн дурсамж дурдатгалын 3 дахь номоо хэвлүүллээ. Үнэхээр сэтгэл хөдөлж байна. Би зургаан жилийн өмнө Монгол ирж байлаа. Түүнээс хойш Монгол оронд их зүйл өөрчлөгджээ. Улаанбаатар хот танигдахын аргагүй өөр болж. Өндөр сүрлэг байшингууд их баригдсан байна. Эрдэнэт хот ч үнэхээр сайхан хөгжиж байна. Би энэ удаад олон хонож, аавынхаа нутаг руу явж амжихгүй. Гэр бүлийн хүн маань ажилтай тул удахгүй нутаг буцна. Сая Дархан хотын удирдлагууд биднийг хүлээн авч уулзсан. Аавын минь нэрэмжит гудамж, хөшөө хүндэтгэлийн цогцолборын шавь тавих ёслолд оролцлоо. Намар есдүгээр сарын 16-нд миний аав Ю.Цэдэнбалын төрсөн өдөр тохиодог. Энэ үеэр Монгол улсын Ерөнхийлөгч У.Хүрэлсүх биднийг Монголд ирэхийг урьсан. Энэ үеэр ирэхдээ аавынхаа төрсөн нутаг Увс аймаг, Давст сумаар явахаар төлөвлөж байна. 2018 онд Монголын төр засгаас Эрдэнэт үйлдвэрийг миний аавын нэрэмжит болгосныг дуулаад үнэхээр их сэтгэл хөдөлсөн. Мөн Монголын шүүхийн байгууллагаас миний эцгийн нэр төрийг сэргээж, гавьяа шагналыг нь буцаан олгосонд талархаж байна. Өнөөдөр сэтгэл хөдлөхгүй байхын арга алга. Үнэхээр баяртай байна” гэлээ.

Ю.Цэдэнбалын хөшөөнд цэцэг өргөх хүндэтгэлийн ёслолд “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн, тус үйлдвэрийн Хамтын ажиллагаа, нийгмийн харилцааны газрын дарга Ц.Бат-Энх болон албаны хүмүүс оролцов. Төр нийгмийн зүтгэлтэн Ю.Цэдэнбал агсаны хүү Зориг нь “Цэдэнбалын академи” ТББ-ын тэргүүнээр ажилладаг юм байна.