Монгол улсын Ерөнхийлөгч У.Хүрэлсүх Орох наймагт ажиллаж байна. Тэрбээр өнөөдөр 14.00 цагт “Уурхайчин" соёлын ордонд болсон “Үр ашигтай хөрөнгө оруулалт, хэмнэлтийн бодлого” уулзалт зөвлөгөөнд оролцож уурхайчдын төлөөлөлтэй уулзав. Монгол улсын Ерөнхийлөгч У.Хүрэлсүхийг дагалдан Ерөнхийлөгчийн Тамгын газрын дарга Я.Содбаатар, Үндэсний аюулгүй байдлын Зөвлөлийн нарийн бичгийн дарга Ж.Энхбаяр, Засгийн газрын гишүүн, Байгаль орчин, аялал жуулчлалын сайд Б.Бат-Эрдэнэ, “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн нар Эрдэнэт хотод ажилласан юм. Манай аймгийн зүгээс ИТХ-ын дарга Д.Мөнхбат, аймгийн Засаг даргын орлогч А.Түвшинжаргал нар Ерөнхийлөгчид бараа болон дагалдан явав.

Ерөнхийлөгч У.Хүрэлсүх “Үр ашигтай хөрөнгө оруулалт, хэмнэлтийн бодлого” уулзалт зөвлөгөөний индэр дээрээс газрын хэвлийн баялгийг Монголын ард түмэндээ хүртээх төр, засгийн Онцгой даалгаврыг 1.5 жилийн хугацаанд нэр төртэй биелүүлж ажилласан “Эрдэнэт үйлдвэр” ТӨҮГ-ын уурхайчин хамт олонд Монголын ард түмний нэрийн өмнөөс, төрийн нэрийн өмнөөс баяр хүргэж чин сэтгэлийн талархлаа илэрхийлсэн юм.

Тэрбээр “ Одоогоос жилийн өмнө бинтй бие Монгол улсын Ерөнхийлөгчийн бүрэн эрхээ хэрэгжүүлсэнийхээ дараахан нь Орхон аймаг, Эрдэнэт үйлдвэрт ажиллаж уурхайчин та бүхний гавьяаг үнэлж Эрдэнэт үйлдвэрийг Монгол улсын Баатар цолоор шагнасан билээ. Тэр цагаас хойш багагүй хугацаа өнгөрсөн ч дэлхий нийтийн нөхцөл байдал хүнд байна. Энэ хүнд хэцүү цаг үед ч үйлдвэрийн уурхайчин та бүхэн ачааны хүндийг үүрэлцэж байгаа. Та бүхэндээ чин сэтгэлийн талархал илэрхийлье” хэмээсэн юм.