Зам тээврийн осол, гэмтлээс иргэдийг урьдчилсан сэргийлэх, тэдэнд нөлөөлөх нөлөөллийн арга хэмжээ болох “Аажуу явбал аяндаа хүрнэ дээ” арга хэмжээний нээлт өнөөдөр орон даяар 14:00 цагт нэгэн зэрэг болов.

Мэдээлэл шуурхай удирдлагын төвд болсон “Аажуу явбал аяндаа хүрнэ дээ” аяны нээлтэд аймгийн ИТХ-ын дарга Д.Мөнхбат, аймгийн Засаг даргын орлогч М.Түмэнжаргал, аймгийн Цагдаагийн газрын дарга, цагдаагийн хурандаа Д.Цэрэнсамбуу, Онцгой байдлын газрын орлогч дарга, ахмад Г.Нэргүйбаатар,  Эрүүл мэндийн газрын дарга Д.Сүхээ болон, “Орхон АЗЗА” ТАҮГ болон бусад холбогдох албаныхан оролцов.

Засгийн газрын 2019 оны 163 тоот тогтоолоор “Замын хөдөлгөөний аюулгүй байдлыг хангах үндэсний хөтөлбөр”-ийг баталсан. Хөтөлбөрийн үр дүнд зам тээврийн ослын улмаас хүний амь нас, эрүүл мэнд хохирох тохиолдлыг 50 хувиар бууруулах зорилт дэвшүүлсэн байдаг. Энэхүү зорилтын хүрээнд Цагдаагийн байгууллагаас урьдчилан сэргийлэх зорилгоор олон улс, улсын чанартай хатуу хучилттай зам дагуух байнгын хяналтын цэгүүдийг түшиглэн камерын хяналтын систем нэвтрүүлэх, төрийн болон ТББ-уудтай хамтран нөлөөлийн аян, нэгдсэн болон хэсэгчилсэн арга хэмжээ зохион байгуулах зэргээр олон нийтэд чиглэсэн ажлыг хийж эхэлжээ. Тухайлбал, өнгөрсөн онуудад Орон нутгийн зам-хөдөлгөөний соёл урьдчилан сэргийлэх арга хэмжээний хүрээнд “Яараад яахав дээ”, “Дураараа биш дүрмээрээ” аяныг зохион байгуулсан нь үр дүнгээ өгсөн байна.

Манай аймгийн  хэмжээнд өнгөрөгч 2021 онд зам тээврийн осол, хэргийн улмаас 6 хүн амь насаа алдсан нь 2020 оноос 3 дахин их үзүүлэлт аж. 2021 онд зам тээврийн ослын улмаас 60 хүн гэмтсэн өмнөх оноосоо 12 нэгжээр буюу 25 хувиар өссөн үзүүлэлт байжээ. 2022 оны байдлаар аймгийн хэмжээнд зам тээврийн ослын улмаас нэг хүн амь насаа алдаад байна.