Аймгийн АН-ын болон МоАХ-ны гишүүд, дэмжигчид эрдэнэтчүүдтэйгээ хамтран Бүрэнбүстийн овоог тахиж наадам хийлээ. Жил бүр Орхон аймгийн АН-ын гишүүн, дэмжигчид Эрдэнэтийн МоАХ-ны гишүүд Бүрэнбүстийн овоог тахиж нааддаг. Эрдэнэтчүүдийн дунд ч “Бүрэнбүстийн овооны наадам хэзээ болох вэ” гэх яриа гарч битүүхэндээ эрэл сурал болдог.

Цар тахлын улмаас сүүлийн хоёр жил Бүрэнбүстийн овоог тахиж наадам хийлгүй өнжсөн. Зөвхөн лам хуваргуудын хүрээнд номоо уншиж овоогоо тахиж ирсэн. Энэ жилийн Бүрэнбүстийн овооны наадам өргөн дэлгэр сайхан боллоо. Эрийн гурван наадмаа, наадмын хуушуураа хүлээсэн наадамчин олон Бүрэнбүстийн овооны наадамд өргөнөөр цугларчээ.

Мөн энэ жилийн овооны наадмын гэнэтийн бэлэг нь Монгол улсын тав дахь Ерөнхийлөгч Х.Баттулга хүрэлцэн ирэж оролцсон явдал байлаа. Аймгийн АН-ын дарга Ц.Батхуяг “Цар тахлаас шалтгаалан сүүлийн хоёр жил завсарлаад байсан Бүрэнбүстийн овооны наадам сайхан болж байна. Аймгийн АН-ын зүгээс бурханы шашны лам хуврагуудтайгаа хамран овоогоо тахиж байна. Наадмаа хийж байна. Эрдэнэтчүүд өргөнөөр оролцож байна. Тэнгэр хангай ч хишгээ хайрлаж нар хур тэгширсэн сайхан наадам боллоо. Хүчит 64 бөх барилдаж, их насны 20 гаруй хурдан хүлэг тоосоо өргөж, эрхий мэргэн харваачид, шагайчид цэц мэргэнээ сорьлоо.

Бүрэнбүстийн овооны наадамд түрүүлсэн бөх тэр жилдээ өнгөтэй байж улсын баяр наадмын өндөр цолонд хүрдэг билэгдлээрээ наадамчид сайхан наадаж байна” хэмээсэн юм.