Монголын татварын албанаас жил бүр “Татвар төлөгчдийн өдрүүд”-ийг  зохион байгуулдаг. “Баримтаа аваарай” уриатай аяныг 4-р сарын 28-аас эхлэн 21 аймгийн хэмжээнд өрнүүлж сургалт, сурталчилгаа явуулж танилцуулсан. Орхон аймгийн Татварын хэлтсээс энэ сарын 23-28-ны хооронд “Баримтаа аваарай” цахим төлбөрийн аяныг үргэлжлүүлж байна.

Орхон аймагт 22 худалдааны үйл ажиллагаа явуулдаг төвүүдээс 1265 татвар төлөгчид цахим төлбөрийн баримтаа хэрэглэгчдэд олгож байна. 2016 оноос хэрэгжиж эхэлсэн НӨАТ-ын тухай хуулиар ширхэг бохь худалдан авсан ч баримтаа авах эрхтэй болсон. Бүх ААН байгууллага, бичил бизнес эрхлэгч баримтаа олгох ёстой. Зах худалдааны төв дээр наймаа хийж буй хүнээс эхлээд таксины жолооч хүртэл баримт өгөх ёстой гэж хуулинд заасан байдаг.

Иргэдийн татварын талаарх мэдлэг, мэдээлэл хомс байдгаас үүдэн  үсчин, гоо сайхан,  маникюрын үйлчилгээ авч, мөнгөө төлчихөөд баримтаа авдаггүй. Өөрөөр хэлбэл шаарддаггүй байна. Энэ нь далд эдийн засаг бий болох эрсдэлтэй юм.

Баримт өгөхгүй байгаа ААН, хувь хүн дээр "E barimt" аппликейшнээр дамжуулан гомдол саналаа илгээх боломжтой. Төлбөрийн баримт өгөөгүй гэсэн гомдол ирвэл ААН-үүдийг1,5 сая төгрөгөөр, иргэнийг 150 мянган төгрөгөөр торгох хуулийн заалттай юм.