“Монгол дайван” ХХК 2014 оноос “Баян-Өндөр эко хороолол” төслийг хэрэгжүүлж 200 айл бүхий хороолол байгуулахаар ажлаа эхлүүлсэн. Гэтэл өнөөдрийг хүртэл төсөл бүрэн хэрэгжиж дуусаагүй, зарим иргэн, айл өрх газрынхаа гэрчилгээг ч авч чадаагүй байгаа. Саяхан аймгийн Засаг даргын Зөвлөлийн хурлаар “Монгол дайван” компанийн гэрээг сунгах боломжгүй гэж шийдвэрлэсэн. Асуудлын гол нь өнөөдрийн байдлаар 50 гаруй айл өрх хашааныхаа газрыг өмчилж, гэрчилгээгээ гаргуулж авч чадаагүй байна.

Аймгийн Засаг даргын шуурхайд энэ асуудлаар А.Түвшинжаргал  дарга Улсын бүртгэлийн хэлтсийн мэргэжилтнээс тодрууллаа.

Улсын бүртгэлийн мэргэжилтэн н.Оюунбат “ Монгол дайван компани тухайн үедээ 115 айлын байшингийн суурийг Төрийн банк, Үндэсний хөрөнгө оруулалтын банкинд барьцаанд тавьсан байдаг. Мөн Нийслэлийн Шүүхийн шийдвэр гүйцэтгэх газар болон Орхон аймгийн Шүүхийн шийдвэр гүйцэтгэх газраас тухайн компанитай холбоотой үл хөдлөх хөрөнгөд шилжилт хөдөлгөөн хийлгэхэд хориг тавьсан байгаа. Тухайн хоёр банкнаас болон Шүүхийн шийдвэрээс чөлөөлж болох тухай шийдвэр гарвал манайхаас гэрчилгээ гарахад ямар ч асуудал байхгүй. Монгол дайван компани дээрх 115 байшингийн суурь дээр гэрчилгээ гаргуулаад банкны барьцаанд тавьсан гэж ойлгож болно. Энэхүү 115 байшингийн суурьнаас 20 орчим айл гэрчилгээгээ авсан байгаа. Тэр айлууд Шийдвэр гүйцэтгэлээс чөлөөлсөн албан бичгээ гаргуулсаны үндсэн дээр гэрчилгээгээ авсан. Мөн барьцаалагч банкнаасаа хэсэгчилж чөлөөлөхийг зөвшөөрсөн албан бичгээ авсан байдаг. Өөрөөр хэлбэл, эрхийг нь түдгэлзүүлсэн газрууд Эрх сэргээж болох тухай албан бичгээ ирүүлбэл гэрчилгээ гарах боломжтой. Монгол дайван компани дуусаагүй барилгын гэрчилгээг гаргуулаад бүгдийг нь банкны барьцаанд тавьсан” хэмээх мэдээллийг өглөө.