“Дахин төлөвлөн барилгажуулах, дэд бүтэцжүүлэх төслүүд” улсын анхдугаар зөвлөгөөн Эрдэнэт хотод болж байна. Улсын хэмжээнд анх удаагаа Орхон аймаг ийм зөвлөгөөнийг зохион байгуулсан нь цаг үеэ олсон, иргэдийнхээ эрэлт хэрэгцээнд нийцсэн, Шинэ сэргэлтийн бодлогын хүрээнд хийж буй энэ оны томоохон ажлын нэг юм. Анхдугаар зөвлөгөөнд 68 байгууллагын 300 гаруй төлөөлөгч биеэр болон цахимаар 350 гаруй иргэн, аж ахуйн нэгж оролцсон юм. Зөвлөгөөний нээлтэд аймгийн Засаг дарга С.Батжаргал хэлсэн үгэндээ

“Орхон аймаг өнөөдөр 46 нас хүрч байна. Тэгвэл Эрдэнэт хотын дараагийн 40 жил ямар байх вэ гэдэг төлөвлөлтийг эхлүүлнэ. Манай аймгийн өөрийн гэсэн онцлог бий. Гэр хороолол нь хотынхоо дээд талд байршдаг. Эрдэнэт хотын хувьд аймгийн ИТХ-ын тогтоолоор баталгаажуулж 2022 онд гурван байрлалд дахин төлөвлөлт хийнэ. Энэ бүхэн дараагийн 40 жилийн ажлын эхлэл болно. Ирэх 40 жилийнхээ ирээдүйг төлөвлөхийн тулд бид олон улсын банк, санхүүгийн байгууллагатай хамтран ажиллаж эхний алхмаа хийгээд байна” хэмээсэн юм.

Зөвлөгөөнд оролцож байгаа Барилга, хот байгуулалтын дэд сайд Б.Золбоо “Монгол улсын иргэдийн 40 гаруй хувь нь стандартад нийцсэн орон сууцанд амьдарч байна. Засгийн газрын мөрийн хөтөлбөрт 150 мянган айлыг орон сууцжуулахаар тусгасан. Үүний тулд гэр хорооллыг дахин төлөвлөх, гэр хороололд нийгмийн бусад асуудлыг давхар шийдэх боломжийг бүрдүүлэхээр ажиллаж байна. 2013 оноос нийслэлд дахин төлөвлөлтийг хийж эхэлсэн. Өнөөдөр хөдөө орон нутагт дахин төлөвлөлт хийх ажлыг эхлүүлэхээр Орхон аймгийн Засаг даргын санаачлагаар анх удаагаа томоохон зөвлөгөөн зохион байгуулж байна. Засгийн газар 2021 онд 1 их наяд төгрөгийг ипотекийн зээлд гаргасан Өнөө жил 700 тэрбум төгрөг төлөвлөсөн. 2013 оноос хойш ипотекийн зээлээр 115 мянган айл өрх орон сууцтай боллоо. Үүний 30 хувь нь зорилтот бүлгийн иргэд байсан бол үлдсэн 70 хувьд нь байрнаас байранд нүүж орсон айл өрх байлаа. Одоо Засгйин газар гэр хорооллын айл өрхөд ипотекийн зээлийг хэрхэн хүргэх журмыг боловсруулж байна. Орхон аймгийн дөхин төлөвлөлтийг дэмжиж цэвэрлэх байгууламжийн үлдэгдэл санхүүжилт болох 1 тэрбум төгрөгийг энэ онд манай яамнаас шийдвэрлэхээр болсныг дуулгая” гэлээ.