УИХ-ын гишүүн Н.Алтанхуягийн санаачлагаар Орхон аймгийн баялаг бүтээгчидтэй Эрдэнэт үйлдвэрийн Ерөнхий захирал Х.Бадамсүрэн болон үйлдвэрийн худалдан авалт хариуцсан албаны хүмүүсийг уулзуулах, холбох ажлын эхний гараа гуравдугаар сарын 21-ний өдөр боллоо.

Тусгайлан гаргасан график төлөвлөгөө, хуваарийн дагуу УИХ-ын гишүүн Н.Алтанхуяг, Д.Батлут, Эрдэнэт үйлдвэрийн Ерөнхий захирал Х.Бадамсүрэн албаны хүмүүс, хэвлэл мэдээллийн төлөөллийн хамт 10 гаруй аж ахуйн нэгж, үйлдвэрээр зочилж нөхцөл байдалтай газар дээр нь танилцсан юм.

Дэнж багийн нутаг Ёс заншлийн өргөөний ард байх Д.Болормаа захиралтай “Ачит Андага” компани бидний анхаарлыг өөрийн эрхгүй татсан юм. Хор саармагжуулах артишок  цай үйлдвэрлэдэг энэ хамт олны дийлэнх нь бүсгүйчүүд аж. Анх 12 эмэгтэй гар сэтгэл нийлэн өрхийн үйлдвэрлэлээ нэгтгэн компани байгуулж байсан бол өнөөдөр тодорхой нэр төрлийн бүтээгдэхүүн үйлдвэрлэдэг хамт олон болжээ. Өөрийн нэр төрлийн гурилан бүтээгдэхүүн үйлдвэрлэхийн зэрэгцээ өөрсдийн гараар, өөрсдийн технологиор артишок тарьж түүнийгээ үйлдвэрлэлд нэвтрүүлэн өдөр тутмын хэрэглээний цай бий болгожээ.

Ийм амжилтад хүрэхийн тулд “Ачит Андага” компанийнхан хөдөө аж ахуйн эрдэмтэн доктор, судлаачидтай хамтран ажилласан байна. Өнөөдөр дэлхий нийт артишок хэмээх ургамлын ашиг тусыг мэддэг болсон. Харин түүнийг өдөр тутмын хэрэглээ болгох, энгийн бүтээгдэхүүн болгох тал дээр эдний хамт олон илүү амжилтад хүрчээ.

Мөн эрдэмтэн, судлаач нарынхаа хамт Орхон аймгийн газар нутаг, хөрс шорооны онцлогийг судлан хөрсний үржил шимийг дээшлүүлэх, таримал ургамлын гарцыг нэмэгдүүлэх чиглэлээр багагүй ажил хийсэн байна. Үүний нэг нь тэдний гарга авсан био ялзмаг юм. Өнөөдөр томоохон худалдааны төв тэр дундаа Номингийн супермаркетад гаднаас оруулж ирсэн бордоо, био ялзмал их байдаг. Тэгвэл “Био бордоо” компанийнхан импортыг орлох бүтээгдэхүүн үйлдвэрлэсэн нь энэ.

Энэ үеэр Эрдэнэт үйлдвэрийн Ерөнхий захирал Х.Бадамсүрэн “ Манай үйлдвэр тэрбм мод үндэсний хөдөлгөөний хүрээнд 20 сая мод тарих даалгавартай. 20 сая гэдэг их тоо. Алив манайхаан, нааш ир. Энэ бүсгүйчүүд, эрдэмтдийн гаргаж авч байгаа энэ био бордоог мод тарихад хэрэглэж болох уу, манайд хэрэгтэй юү. Судалж үзсэн зүйл байна уу” хэмээн шалгаасан. Харин үйлдвэрийн ногоон байгууламж, байгаль орчин хариуцсан албаны хүмүүс “Био бордоогийн шимт хөрс, био ялзмагийн үйлдвэрлэлийг судалсан, мэднэ. Бараг л хамтарч ажиллаж байгаа. Мод тарихад үнэхээр хэрэгтэй түүхий эд.

Тэр дундаа мод үржүүлэгт бол маш чухал. Эдний эрдэмтэн судлаачидтай хамтарч ажиллаж байгаа” хэмэн хариуллаа.

“Ачит Андага”, “Био бордоо” компанийн 10 гаруй гэр бүлийнхэн өнгөрсөн жил өөрийн гэсэн 2.8 га хүлэмжийн аж ахуйтай болжээ. Цаашдаа дөрвөн улирлын хүлэмжийн аж ахуйтай болохоор төлөвлөсөн тухайгаа дуулгахад Н.Алтанхуяг гишүүн “Сайн судлах хэрэгтэй шүү. Өртөг өндөртэй гээд нэг их хөгжихгүй байгаа. Улсын зүгээс хөгжүүлэх гэж үзсэн шүү, судлаарай” гэв. “Ачит Андага” компанийн захирал Д.Болормаа “Судалж байгаа, Эхний ээлжинд 2.8 га газартай болсон. Өөрийн аргаар, өөрийн технологиор өвлийн хүлэмжийн асуудлыг шийдэх боломжтой” хэмээн итгэл төгс өгүүллээ.

Санаа, сэтгэл нийлсэн 10 гаруй гэр бүлийнхэн хийж бүтээснээ зах зээлд нийлүүлэх, хүнд хортой нөхцөлд ажиллаж байгаа уурхайчдынхаа эрүүл мэндэд зориулан артишок, түүгээр хийсэн дүрдэг цай гээд нэлээн хэдэн нэр өтрлийн бүтээгдэхүүнийг хйисэн байна. Түүнийгээ  Эрдэнэт үйлдвэрт нийлүүлэхэд хүндрэл учирч буйгаа ч дуулгав. Өнгөрсөн жилийн эргэлтийн хөрөнгө нь 20 сая төгрөг, үүнээс шалтгаалаад тендэрт оролцоход хүндрэлтэй тулгарчээ. Улмаар банкнаас зээл авах гэхэд эргэлтийн хөрөнгө бага, барьцаа хөрөнгө дутмаг гээд шалгуурын өмнө бүдэрдэг аж. Манайд зочилсон УИХ-ын эрхэм гишүүд, Үйлдвэрийн захирал та бүхэн тусалж дэмжвэл бид бэрхшээлийнхэ эард гарах боломж байна хэмээлээ. “Өнөөдөр Эрдэнэт үйлдвэрт нэг шил артишок 2800 төгрөгөөр нийлүүлэгддэг. Үүний шил нь 1800 төгрөг. Өртөг өндөртэй. Харин манай энэ эмэгтэйчүүд асуудлыг шийдэн артишокыг нунтаг хэлбэрээр, цай шиг болгон үйлдвэрлэсэн. Нэг хайрцгандаа 15 ширхэг байгаа. Үнэ нь 7500 төгрөг. Өөрөөр хэлбэл, 15 хоногийн хордлого тайлах артишок цай 7500 төгрөг. Үүнийг уурхайчид худалдан авчихвал бидэнд маш их хэрэг болох гээд байна. Одоо бид гаднаас 60 сая төгрөгийн үнэ бүхий тоног төхөөрөмжөө өнөө маргаашгүй авна. Энэ 7500 төгрөгийн үнэтэй 15 хоногийн хэрэглээний цайг л та бүхэн худалдан авч бидний ажилд дэм болооч” хэмээн үйлдвэрлэгч бүсгүйчүүд чин сэтгэлээсээ өгүүлж байлаа.