Аймгийн Хот тохижуулах газрын Үйлдвэрчний хорооны дарга Б.Эрдэнэбат амьжиргааны баталгаажих доод түвшнээ нэмж амлалтаа биелүүлээч, ТҮ1-ТҮ3 зэрэглэлээр цалинждаг үйлчлэгч, манаач гээд доод тушаалын ажилтнуудын амьдрал хүнд байгаа талаар Хэвлэлийн бага хурал хийлээ.  Энэ үеэр хэвлэлийнхэн түүнээс “Энэ оны нэгдүгээр сарын 1-нээс хогны мөнгийг байшин хороололд 5 мянга, гэр хорооллын айл өрхийн хогны мөнгийг 3000 төгрөг болгон нэмсэн. Хог ачилт, тээвэрлэлтэд ахиц гарч байна уу. Айл өрхөөс авч байгаа хогны мөнгө чинь 3-5 дахин нэмэгдлээ. Нөхцөл байдал дээрдсэн үү” хэмээсэн асуусан билээ. Тэрбээр, “Хог ачилтны мөнгө нэмэгдсэн ч бидэнд өгдөггүй шүү. Бидэнд юу ч наалдаагүй. Төрийн санд төвлөрүүлчихдэг. Төрийн сан нээгдэхгүй байж байгаад хэд хоногийн өмнө ажилласан гэж дуулсан. Хог ачилт, тээвэрлэлт өмнөхөөсөө дээрдээгүй. Та бүхэн мэдэж байгаа, хэдхэн хоногийн өмнө бензины үнэ 100 төгрөгөөр нэмэгдсэн. Түлш, шатахуун нэг литр нь 2920 төгрөг боллоо. Өнөөдөр урин дулааны цаг ирэхлээр залуу хүмүүс хувийн хэвшилд өдрийн 70 мянган төгрөгийн цалинтай гэж дуулаад гараад явж байна. Хорих эрх байхгүй, сар зүтгээд 420 мянган төгрөг авч үйлээ үзэж байхаар тэр мөнгийг 7 хоногт олно гээд явж байгаа. Үүнээс болоод хог ачих хүн байхгүй боллоо” гэсэн юм.

Хэвлэлийн хуралд аймгийн Үйлдвэрчний холбооны тэргүүн М.Батцоож оролцсон юм.