Монгол улсын Засгийн газрын 2021 оны арванхоёрдугаар сарын 21-ний өдрийн 377 дугаар тогтоолоор аймгийн ЗДТГ-ын бүтэц, орон тооны хязгаарыг тогтоожээ. Тогтоолд заасны дагуу аймгийн ЗДТГ-ын Хөрөнгө оруулалт, хөгжлийн бодлого төлөвлөлтийн хэлтсийн нэрийг Хөгжлийн бодлого, төлөвлөлт, хөрөнгө оруулалтын хэлтэс /ХБТХӨОХ/ хэмээн нэрийг нь өөрчилжээ. Мөн аймгийн ЗДТГ-ын Хяналт шинжилгээ, үнэлгээ дотоод аудитын хэлтэс гэж байсныг Хяналт шинжилгээ, үнэлгээний хэлтэс  /ХШҮХ/ болгон өөрчилсөн байна.

Орон нутгийн онцлог, нутаг дэвсгэрийн хэмжээ, хүн амын тоо, эдийн засаг, үйлдвэрлэлийн цар хүрээнээс хамааруулан Архангай, Баян-Өлгий, Баянхонгор, Дархан-Уул, Дорноговь, Дорнод, Завхан, Орхон, Өвөрхангай, Сэлэнгэ, Төв, Увс, Ховд, Хөвсгөл, Хэнтий аймгийн ЗДТГ-ын орон тоог энэ тогтоолоор 46 ажилтан, албан хаагчтай байхаар тогтоожээ.

Мөн энэ тогтоолоор аймгийн Засаг даргын дэргэдэх зарим агентлагийн нэрийг өөрчилсөн байна. Үүнд, Боловсрол, соёл, урлагийн газрын нэрийг 2022 оны нэгдүгээр сарын 1-нээс хойш Боловсрол, шинжлэх ухааны газар  /БШУГ/ болгожээ. Харин Соёлын хэлтсийг Соёл, урлагийн газар  /СУГ/ болгон өөрчилсөн байна.

Нийгмийн даатгалын хэлтсийн харьяанд байсан Эрүүл мэндийн даатгалын байгууллагыг өргөжүүлж Эрүүл мэндийн даатгалын хэлтэс болгон өөрчилжээ.

Аймгийн Засаг даргын дэргэд 25 тохируулагч болон хэрэгжүүлэгч агентлаг ажиллаж байна.